Balı aralynda qonaqúıler men meıramhanalardyń jańa qurylysyna tyıym salyndy
ASTANA. KAZINFORM – Indonezııa bıligi Balı aralynda jýyrdaǵy joıqyn sý tasqynynan keıin jańa qonaqúıler men meıramhanalardyń salynýyna tyıym saldy, dep habarlaıdy The Guardian.
Sý tasqyny saldarynan 18-den astam adam qaza tapty, myńdaǵan turǵyn Denpasar men kórshiles aýdandarda zardap shekti. Joıqyn apat úılerge, ınfraqurylym men qoǵamdyq nysandarǵa úlken shyǵyn keltirdi.
Gýbernator Vaıan Kosterdiń málimdeýinshe, bıyldan bastap aýyl sharýashylyǵy jáne egistik jerlerdi kommertsııalyq maqsatta ıgerý toqtatylady.
«2025 jyldan bastap birde-bir ónimdi jer qonaqúı nemese ózge de nysan salýǵa berilmeıdi. Bul sheshim Balı aralynyń 100 jyldyq damý josparyna engizildi», – dedi ol.
Ekologtar kópten beri araldaǵy shamadan tys týrızmniń qaýpi týraly dabyl qaǵyp kelgen. Olar jerdi baqylaýsyz ıgerýdi shekteý tabıǵı apattar qaýpin azaıtýǵa yqpal etetinin atap ótti.
Balı kúrish alqaptary men ásem jaǵajaılarymen áıgili bolǵanymen, sońǵy onjyldyqtarda aralda qonaqúı jáne týrıstik nysandar shamadan tys kóbeıip, jergilikti halyq pen qonaqtardyń narazylyǵyn týǵyzǵan.
Byltyr da Indonezııa bıligi jańa qonaqúılerdiń qurylysyna moratorıı engizetinin habarlaǵanymen, ol jospar júzege aspaǵan. Endi jańa normatıvtik qujattar 2025 jyldyń sońyna deıin kúshine enýi tıis.
Bul sheshim Indonezııa meteorologııalyq agenttiginiń bıylǵy maýsymda ekstremaldy jaýyn-shashyn kútiletini týraly eskertýinen keıin qabyldanyp otyr. Ǵalymdardyń pikirinshe, klımattyń ózgerýi saldarynan nóserler jıilep, kenetten bolatyn sý tasqyndarynyń qaýpi kúsheıgen.
Buǵan deıin Balı aralynda sońǵy on jyldaǵy eń kúshti sý tasqyny tirkelip, apatqa baılanysty bir aptalyq tótenshe jaǵdaı rejımi jarııalanǵan bolatyn.