Balǵyn fýtbolshylar Anatolıı Ionkınge arnalǵan týrnırde baq synady
ORAL. QazAqparat - «Aqjaıyq» fýtbol klýbynyń stadıonynda ataqty shabýylshy Anatolıı Ionkındi eske alýǵa arnalǵan balalar arasyndaǵy dástúrli týrnır márege jetti, dep habarlaıdy «QazAqparat» tilshisi.
8 mamyr kúni bastalyp, 13-inde aıaqtalǵan jarysqa elimizdiń batys óńirlerinen barlyǵy segiz komanda qatysyp, baq synady.
Fınaldyq matchta «Aqjaıyq-2006» komandasy Atyraýdan kelgen qurdastaryn 2:0 esebimen tize búktirip, jeńimpaz atandy. Úshinshi oryn úshin básekede «Aqtóbe-2006» aqtaýlyq «Kaspıı-2006» komandasyn 3:0 esebimen utyp, qola júldege ıe boldy.
Týrnırdiń jabylý rásiminde «Aqjaıyq» fýtbol klýbynyń dırektory Azat Qazıhanovtyń atap ótkenindeı, Anatolıı Mıhaılovıch Ionkınniń sporttaǵy joly dál osy alańda bastaldy. Áýeli Aq Jaıyqta dop tepken A.Ionkın keıin almatylyq «Qaırattyń» sapynda oınap, KSRO-nyń eń úzdik shabýylshylarynyń qatarynan kórindi.
A.Ionkındi eske alýǵa arnalǵan týrnır «Aqjaıyq» fýtbol klýbynyń uıymdastyrýymen jyl saıyn mamyr aıynda ótkizilip keledi.
Eske sala keteıik, A.Ionkın (4.10.1950, Oral - 13.05.2009, Oral) Oral qalasynda týyp-ósti. «Qaırattyń» quramynda KSRO chempıonatynda 25 gol soqty. Ásirese, 1974 jylǵy maýsymda qarsylastar qaqpasyna 16 dop engizip, Oleg Blohınnen keıin ekinshi orynǵa kóterildi. Jattyqtyrýshylyq qyzmet atqaryp, Qazaqstan fýtbol federatsııasynyń vıtse-prezıdenti bolǵan Anatolıı Ionkın Oralǵa kelgen saparynda 2009 jyly 13 mamyrda bir kezde ózi dop tepken dál osy stadıonda júregi toqtap, kóz jumdy.
Onyń 1948 jylǵy aǵasy Aleksandr Ionkın de - ataqty sportshy ári jattyqtyrýshy. Oralda alǵashqy qadamyn bastap, 1968 jyly almatylyq «Dınamo» klýbyna shaqyrylǵan ol dopty jáne kógaldaǵy hokkeıden úlken tabystarǵa qol jetkizdi. Shabýyl shebinde jasyndaı jarqyldap, dopty hokkeıden «Dınamo» quramynda Eýropa chempıondary kýbogynyń ıegeri, KSRO chempıony (1977), alty márte kúmis, úsh dúrkin qola júldegeri atandy. Bes ret chempıonat úzdikteriniń qatarynan kórindi. Kógaldaǵy hokkeıden bes márte KSRO chempıony, úsh ret kúmis júldeger, jeti dúrkin úzdik mergen ataǵyna qol jetkizdi. KSRO quramasynda da oınady. Keıin dopty hokkeıden Qazaqstan quramasyn uzaq jyldar boıy jattyqtyrdy.
