Balger bir azamattyń 9 mıllıonǵa jýyq teńgesin aldap alǵan - Qyzylorda oblysy
QYZYLORDA. QazAqparat - Qyzylorda oblysy Jańaqorǵan aýdanynda bir azamatsha jergilikti turǵynǵa bal ashyp, jolyn jeńildetip beretinin aıtyp san soqtyryp ketken. Jábirlenýshige keltirilgen shyǵyn 8 mln 853 myń teńgeni quraıdy, dep habarlaıdy QazAqparat tilshisi.
Quqyq qorǵaý salasynyń mamandary halyqtyń balger men táýipterge aldanyp qalatynyn aıtady. Qazir oblysta mundaı derekter jıi oryn alady. Solardyń biri Jańaqorǵan aýdanynda bolǵan osy oqıǵa. Ózin balger retinde kórsetken áıel jergilikti turǵynǵa «jolyńdy jeńildetip beremin, baıyp ketesiń», - degen jeleýmen birneshe márte aqsha alǵan. Atalmysh alaıaqtyq derek sotta qaralyp, kúdiktiniń kinási dáleldendi. Onyń 5 jylǵa bas bostandyǵy shekteldi.
Qazirgi tańda Qyzylorda oblysynda alaıaqtyq derekteri alańdatyp otyr. Ústimizdegi jyldyń 7 aıynda Qyzylorda oblysynda 418 alaıaqtyq qylmysy tirkeldi. Ol ótken jyldyń dál osy kezeńimen salystyrǵanda 3,2 paıyzǵa azaıǵan. Dese de tártip saqshylaryn ózgeniń menshigin alaıaqtyq jolmen ıelený arqyly azamattardyń quqyna qol suǵý derekteri oryn alyp jatqanyn oılantady.
«Bıylǵy 7 aıda alaıaqtyq jasaǵany úshin 162 tulǵa ustaldy. Onyń ishinde 109-y áıelder bolyp otyr. Ony ashýda birqatar qıyndyqtar kezdesedi. Atap aıtqanda, jábirlenýshiler kesh aryzdanyp jatady. Bıyl osyndaı 26 azamat kesh aryzdanǵan. Olardyń arasynda 2-3 jyldan keıin polıtsııaǵa aryzdanyp kelgenderi bar. Shyndyǵyn aıtqanda, keıbir azamattar qazir jeńil paıda tabý nemese máseleni ońaı sheshý joldaryn izdeıtindigi ras. Sondaı-aq, azamattardyń quqyqtyq saýattylyǵy tómen», - dedi oblystyq ishki ister departamenti baspasóz qyzmetiniń basshysy Gúljahan Qaıyrbergenova.
Kóp jaǵdaıda alaıaqtar jer, úı alyp beremin degen ýádesin beredi. Sonymen qatar, jumysqa turǵyzamyn deıtinder kezdesedi. Tártip saqshylary alaıaqtarǵa aldanbaýdyń jolyn izdep árbir iske saqtyqpen qaraýdyń durys ekenin eskertedi.
