Baldyr men asshaıan qabyǵynan jasalǵan materıal smartfondy massajerge aınaldyra alady
ASTANA. KAZINFORM — AQSh-taǵy Kornell ýnıversıtetiniń zertteýshileri baldyr, asshaıan qabyǵy jáne jelatın negizindegi jipterden erekshe mata jasap shyǵardy. Ol suıyqtyqtyń áserinen pishinin ózgerte alady. Bolashaqta bul tehnologııa qyzmetin ózgerte alatyn túrli gadjetter jasaýǵa múmkindik beredi, dep jazady Cornell Chronicle.
— Smartfonyńyz pishinin ózgerte alady dep elestetip kórińiz. Áýeli ol telefon qyzmetin atqarady, al moınyńyzdy ýqalaý qajet bolǵanda massaj jasaıtyn jastyqqa aınalady. Bul — bizdiń zertteý salamyzdaǵy mańyzdy ıdeıalardyń biri. Qazir ony júzege asyrýdyń túrli joldary zerttelip jatyr, — dedi Adam ekologııasy kolledjindegi Hybrid Body zerthanasynyń jetekshisi Sındı Kao.
AquaWeave dep atalatyn jobanyń alǵashqy kezeńinde jańa jipterdiń keıbir qasıetteri kemshilik retinde qarastyrylǵan. Máselen, baldyrdan jasalǵan jip sýǵa tıgende isinedi, asshaıan qabyǵynan alynǵan jip qyshqyl ortada sozylady, al jelatınnen jasalǵan jip sýda erip ketedi.
— Keıin biz bul qasıetterdiń ózin qyzyqty múmkindik retinde qarastyrýǵa bolatynyn túsindik, — dedi Kao.
Zertteý nátıjesinde suıyqtyqtyń áserinen pishinin ózgertetin matalardyń birneshe túri jasaldy. Olardyń keıbiri tútik tárizdi shıratylsa, endi biri klapan, kúmbez nemese shyǵyńqy pishinge enedi. Al jelatın jipteri erigen kezde matanyń betinde tesikter paıda bolady. Mundaı materıaldardy adam men kompıýter arasyndaǵy ózara árekettesýdi jeńildetetin qurylǵylarda qoldanýǵa bolady.
Zertteý jumysyn 4 qarashada Detroıtta ótken ACM UIST 2026 konferentsııasynda jobanyń jetekshi avtory, Kaonyń burynǵy doktoranty, qazir Kalıfornııa ýnıversıtetiniń Devıstegi kampýsynyń dotsenti Tszınven Chjý tanystyrdy.
Onyń aıtýynsha, zertteý belgili bir materıalǵa nemese órnekke ǵana negizdelmegen. Ǵalymdar matany toqýdyń ártúrli tásilderi onyń qasıeti men pishininiń ózgerýine qalaı áser etetinin zerttegen. Bul basqa zertteýshilerge de ózderiniń toqý úlgilerin ázirleýge múmkindik beredi.
Jobaǵa Norvegııada ótken konferentsııaǵa qatysqan toqymashylar da tartylǵan. Sheberlerdiń biri baldyr jibiniń isiný qasıetin paıdalanyp, bederli mata jasaǵan. Ekinshisi matanyń shıratylýyna negizdelgen órnek oılap tapsa, úshinshisi úsh qabatty mata toqyp, ortańǵy qabaty ózgergen kezde ishki qurylymy syrtqa kórinetin úlgi ázirlegen.
Kao jetekshilik etetin zerthana terige tikeleı taǵylatyn basqa da qurylǵylardy jasap jatyr. Mysaly, SkinLink modýlder jıyntyǵy birneshe mınýt ishinde qol qozǵalysyn baqylaıtyn ıkemdi datchık qurastyrýǵa múmkindik beredi. Ol egde jastaǵy adam qulap qalǵan jaǵdaıda habarlama jibere alady.
Al Weill Cornell Medicine ońaltý medıtsınasy bólimshesimen birlesip jasalǵan EdemaFlex qurylǵysy qoldyń isinýin azaıtýǵa arnalǵan.
Aıta keteıik, jas zertteýshiler elektr jelilerine arnalǵan JI jáne qaterli isikti emdeıtin nanogel ázirlep jatyr.
Eske salaıyq, Iran ǵalymdary súıek tininiń qalpyna kelýin jedeldetetin tehnologııa ázirledi.