«Baldáýrende» balalardyń jazǵy demalysyn uıymdastyrý máseleleri talqylandy
ASTANA. Sáýirdiń 16-sy. QazAqparat - Aqmola oblysynyń Býrabaı aýdanydaǵy «Baldáýren» respýblıkalyq oqý-saýyqtyrý ortalyǵynda «Qazaqstan Respýblıkasyndaǵy balalar men jasóspirimderdiń jazǵy demalysyn, saýyqtyrý jáne jumyspen qamtylýyn uıymdastyrý» taqyrybynda dóńgelek ústel bolyp ótti,
dep habarlaıdy QazAqparat.
Dóńgelek ústelge qatysýshylar «Baldáýren» ortalyǵynyń jumysymen tanysyp, lagerde demalyp jatqan balalarmen kezdesip, áńgimelesti, sabaqtaryna qatysty. Odan keıin dóńgelek ústeldiń kún tártibine sáıkes Bilim jáne ǵylym mınıstrliginiń balalardyń quqyqtaryn qorǵaý komıtetiniń tóraıymy Raısa Sherdiń elimizdegi balalardyń jazǵy demalysyn uıymdastyrýǵa qatysty baıandamasy tyńdaldy. Onda jyl saıyn elimizde ár túrli úlgidegi 10 myńnan astam lagerlerdiń jumys istep, 1 mıllıonnan astam balanyń qamtylatyny aıtyldy.
Sodan keıin basqosýǵa qatysýshylarǵa «Artek» (Ýkraına), «Orlenok», «Okean» (Reseı), «Zýbrenok» (Belarýs) halyqaralyq balalar ortalyqtarynyń jumysy týraly fılm kórsetilip, «Baldáýren» respýblıkalyq oqý-saýyqtyrý ortalyǵynyń damý bolashaǵy týraly onyń Bas dırektory Muhıtdın Tólepbaev sóz sóıledi. Onyń málimdeýinshe, «Baldáýren» ortalyǵy jyl boıy jumys isteıdi jáne aýysymyna úzdik oqýy, belsendi ómirlik ustanymy úshin konkýrstyq negizde joldama alǵan 11-den 15 jasqa deıingi 300 balaǵa deıin qabyldaıdy.
Oqýshylardyń jazǵy demalysyn damytýdyń óńirlik máselelerin sheshý boıynsha óz aýmaqtarynda jyl boıy jumys isteıtin balalar ortalyqtary bar Ońtústik Qazaqstan jáne Mańǵystaý oblystary bilim basqarmalarynyń bastyqtary óz usynystarymen bólisti.
Basqosýǵa qatysýshylar atalǵan jumysty jetildirý máseleleri boıynsha suraq-jaýaptarmen pikir almasty, saýyqtyrý lagerleri júıesin budan ári damytý týraly usynystardy talqylady.
Májilistiń Áleýmettik-mádenı damý komıteti men QR Bilim jáne ǵylym mınıstrligi birlesip uıymdastyrǵan osy dóńgelek ústeldiń jumysyna Parlament depýtattary, birqatar ortalyq jáne jergilikti atqarýshy organdardyń ókilderi qatysty.
