«Balbóbek» balalar shyǵarmashylyǵy baıqaýynyń jeńimpazdary anyqtaldy
ASTANA. 12 qarasha. QazAqparat - Elordada «Balbóbek» balalar baıqaýy qorytyndylandy, dep habarlaıdy elordanyń resmı saıtynan. Alaqaılaǵan balaqaılar elimizdiń ár óńirinen kelgen. Balalar shyǵarmashylyǵyn damytýdy maqsat etetin baıqaýda basty nazar da, bar qoshemet te kishkentaı ónerpazdarǵa arnaldy.
Atalǵan is-sharada 5-10 jáne 11-14 jas sanatynda «Vokal», «Horeografııa» atalymdary boıynsha 20 bı toby, 25 jas oryndaýshy baq synady. Jalpy, baıqaýǵa 300-ge jýyq bala qatysqan.
«Balbóbek-2013» balalar baıqaýynda «Vokal» atalymy boıynsha eresekter tobynda astanalyq Aıymjan Kabsalıamova bas júlde ıegeri atandy. Al kishi topta Shymkentten kelgen Vladıslav Pampýrovtyń baǵy jandy. «Horeografııa» atalymynda elordalyq qatysýshylardyń joly boldy. Eresekter tobynda «Tumar» halyq bı ansambli, kishi topta «Jemchýjınkı» ansambli bas júldeni qanjyǵalaryna baılady.
