Balaýsa Muzdyman kezekti jekpe-jeginiń aldynda jaraqat alyp qaldy

ASTANA. KAZINFORM – Qazaqstandyq kásipqoı boksshy Balaýsa Muzdyman Almatyda josparlanǵan  jekpe-jeginiń ótpeıtinin habarlady. Bul týraly Sports.kz jazdy.

Sportshy Instagram-daǵy paraqshasynda jankúıerlerine aldaǵy jekpe-jekke qatysty jaısyz jańalyǵymen bólisti. Ol daıyndyqtyń joǵary deńgeıde ótkenin, alaıda moıyn jaraqatyna baılanysty aldaǵy aıqastyń keıinge shegerilgenin aıtty. 

Onyń sózinshe, komanda uzaq ýaqyt boıy tyńǵylyqty jumys istep, jekpe-jekke arnaıy baǵdarlama ázirlegen. Degenmen jaraqat saldarynan jospar ózgergen.

Bylǵary qolǵap sheberi birinshi kezekte tezirek jaraqatynan jazylýyna basymdyq beretinin aıtyp, qoldaý kórsetken barsha jankúıerge alǵysyn jetkizdi. 

Aıta keteıik, 27 jeltoqsanda Balaýsa Muzdymannyń Almatyda judyryqtasatyny belgili bolǵan. Biraq qarsylasynyń esimi resmı túrde jarııalanbaǵan.

Eske salsaq, osyǵan deıin kásipqoı bokstan el namysyn qorǵap júrgen Balaýsa Muzdyman (6-0, 5 KO) Astanadaǵy «Battle of the Brave» boks keshinde jeńiske jetkenin jazǵanbyz.