Balaýsa Mýzdıman Astanadaǵy boks keshinde sharshy alańǵa shyǵady

ASTANA.KAZINFORM - Kásipqoı bokstan el namysyn qorǵap júrgen burymdy qyz Balaýsa Mýzdıman (6-0,5KO) Astanada ótetin boks keshinde sharshy alańǵa shyǵady.

Nomad Promotions kompanııasynyń habarlaýynsha, Balaýsa 5 sáýir kúni ótetin Jánibek-Anaýel aıqasy anderkartynda judyryqtasady, onyń qarsylasy jeńilip kórmegen amerıkalyq boksshy Rozalında Rodrıges (14-0, 3KO).

- Jankúıerlerim úshin óte tartysty jekpe-jek bolady. Sebebi, qarsylasym eshqashan jeńilip kórmegen amerıkalyq qyz. Tartysty básekede Qazaq eline jeńis syılaý úshin bar kúshimdi salamyn, - dedi Balaýsa.

Eske sala ketsek, Jánibek Álimhanuly kezekti jekpe-jeginde Anaýel Ngamıssengýge (14-0, 9KO) qarsy chempıondyq beldikterin qorǵaıdy.

Atalǵan boks keshinde búginde ulttyq qurama sapynda el namysyn qorǵap júrgen aǵaıyndy Sabyrhandar sharshy alańda kásipqoı boksta baq synap kórmek.

Aǵaıyndy boksshylardyń qarsylasy ázirge anyqtalmaǵan.

Sondaı-aq, osy kúni Sultan Zaýyrbek pen Batyr Júkembaev ta boks keshiniń kórigin qyzdyrady dep josparlanyp otyrǵany belgili boldy.

Kásipqoı boksshy osyǵan deıin ótken baspasóz maslıhatynda Kazinform tilshisine aldaǵy jospary týraly aıtyp bergen bolatyn.