Balasynyń teris qylyǵy úshin ata-anaǵa jaza jeńildeıdi
ASTANA. QazAqparat - Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine balanyń quqyqtaryn qorǵaý jónindegi fýnktsııalardy júzege asyratyn uıymdardyń qyzmeti máselesi boıynsha ózgerister men tolyqtyrýlar engizý týraly» zań jobasyn birinshi oqylymda maquldady, dep habarlaıdy QazAqparat.
Zań jobasyndaǵy túzetýlerdiń birinde kámeletke tolmaǵandar jasaǵan is-áreketter úshin ata-anasyn jáne basqa da adamdardy jazalaýǵa qatysty normany Qylmystyq kodeksten alyp tastap, Ákimshilik quqyq buzýshylyq týraly kodekske aýystyrý eskerilgen. Sonymen qatar qujatta balalardyń atalǵan is-áreketteri úshin aıyppuldy 200 AEK-ten 10 AEK-ke deıin azaıtý qarastyrylǵan.
Óz kezeginde Májilis Tóraǵasy atalǵan usynysqa qoldaý bildirdi. «Bul qadamdar tolyqtaı ákimshilik ári qylmystyq zańnamany izgilendirý boıynsha trendke sáıkes keledi», - dedi Nurlan Nyǵmatýlın.
Osy oraıda ol balalar tarapynan teris qylyqtar bolyp jatatynyn, sondyqtan birden qylmystyq jaýapkershilikke tartýdyń qajeti joq ekenin jetkizdi.
Sonymen qatar N. Nyǵmatýlın aıyppuldar somasy tómendegen jaǵdaıda, balalardyń tárbıesi men osyndaı teris qylyqtarǵa jol bergizbeý boıynsha máselege ata-analardyń tıisti deńgeıde mán bermeýi múmkindigine alańdaýshylyq bildirdi.
Onyń paıymynsha, ata-analar men balalar úılerindegi pedagogtar árdaıym jetkinshekterdiń tárbıesinde jaýapkershilikti sezinýi tıis.
«Jumys toby atalǵan máseleni ekinshi oqylymǵa deıin taǵy da pysyqtaýy kerek», - dedi Nurlan Nyǵmatýlın.
