Balasynyń quqyǵyn buzǵan 500 ata-ana jaýapkershilikke tartyldy
«Qolaısyz otbasydan shyqqan balalardy tárbıeleýde mindetterin oryndamaǵan 600-den astam ata-ana anyqtalyp, esepke alyndy. Olardyń ishinde 500-den astamy balalarynyń quqyqtaryn buzǵany úshin ákimshilik jaýapkershilikke tartyldy», - dedi resmı ókil ІІM baspasóz qyzmeti alańynda ótken brıfıngte.
Sonymen qatar ol 17-19 qyrkúıek aralyǵynda ótkizilgen «Jasóspirim» jedel aldyn alý is-sharasy barysynda oqý oryndaryndaǵy quqyq buzýshylyqtardyń aldyn alý jumystaryna erekshe nazar aýdarylǵanyn aıtty. Іs-shara barysynda 5 myńnan astam mektep pen 600 kolledj qamtyldy. Oqýshylarmen quqyq buzýshylyqtyń aldyn alý jónindegi áńgimelesý júrgizildi. Balalarǵa qoǵamdyq orynda júrip-turý erejesi, beıtanys adamdarmen sóılesý, sonymen qatar janjal týyndaǵan jaǵdaıda áreket etý barysy túsindirildi.
«Munan bólek, polıtsııa organdarynda esepte turǵan jasóspirimder men qolaısyz otbasylardyń turǵylyqty jerlerin tekserý boıynsha reıdter uıymdastyrylyp, turmystary zerdelendi, ata-analarmen áńgimelesý júrgizildi», - dedi Nurdildá Oraz.
