Balasynyń kózinshe áıelin óltirgen qostanaılyq jazadan bosatyldy
QOSTANAI. QazAqparat - Qostanaı oblysy qylmystyq ister boıynsha mamandandyrylǵan aýdanaralyq soty óz áıelin óltirgen turǵynǵa qatysty isti qarady, dep habarlaıdy QazAqparat oblystyq sottyń baspasóz qyzmetine silteme jasap.
Іs derekterine súıensek, 2017 jyldyń 23 mamyrynda Esmaǵambet Jákenov áıelin pyshaqtap tastaǵan. Kóp qan joǵaltqan jábirlenýshi jedel járdem kómegi kelgenshe kóz jumdy.
«Tártip saqshylary áıelin týǵan qyzy men 6 jasar nemeresiniń kózinshe óltirgen Jákenovti qudyqtan taýyp alǵan. Qazir ol psıhıkalyq dıspanserde em alyp jatyr. Statsıonarlyq psıhologııalyq-psıhıatrııalyq saraptamanyń qorytyndysyna sáıkes, ol áreketke qabiletsiz dep tanyldy», - delingen sottyń baspasóz qyzmeti taratqan habarlamada.
Belgili bolǵandaı, Jákenov jubaıymen 30 jyl birge turǵan. Otbasy músheleriniń aıtýynsha, ol sońǵy kezderi kóp qyzbalyqqa salynyp ketken. Árdaıym áıeline narazylyq tanytyp otyrǵan. Tipti, kózine shóp salyp júrgenin aıtyp, ony únemi soqqyǵa jyqqan.
Mamandar Jákenovtiń psıhıkasynyń buzylǵanyn rastap, «hronıkalyq sandyraqtaý » dıagnozyn qoıdy. Osylaısha, ol qylmystyq jazadan bosatyldy. Endi ol psıhıatrııalyq statsıonardyń qarqyndy baqylaýyna alynyp, emdeletin bolady.
