Balasynyń basynan taspen urǵan áke ómir boıy bas bostandyǵynan aıyrylýy múmkin
ALMATY. QazAqparat - Búgin aldyn ala sot otyrysynda balasynyń basynan taspen urǵan ákeniń ómir boıy bas bostandyǵynan aıyrylýy múmkin ekendigi belgili boldy, dep habarlaıdy QazAqparat tilshisi.
«2018 jyly 16 shildede Brıanskaıa kóshesinde Asqaroǵly Murat dármensiz tulǵaǵa qylmys jasaǵan. Ol QR QK 24-babynyń 3-bólimimen, 99-babynyń 2-bóliminiń 3-tarmaǵymen aıyptalyp otyr. Bul asa aýyr qylmysqa jatady. Mundaı qylmys jasaǵan adam ómir boıy bas bostandyǵynan aıyrylyp nemese ólim jazasyna kesilýi múmkin», - dedi memlekettik aıyptaýshy.
34 jastaǵy Murat Asqaroǵly bul málimdemege birden qarsylyq bildirdi.
«Men mundaı soraqy qylmys jasaǵan joqpyn. Meni balama qol kótersin dep tárbıelegen joq», - dedi ol.
Sonymen qatar sottalýshy men onyń qorǵaýshysy qylmystyq isti qylmystyq isti qaraýǵa alqa bıler soty qatysýyn surady.
Odan bólek sottalýshyny bultartpaý sharasyn ózgertip, sot aıaqtalǵansha Murat Asqaroǵlyn úıine jibere turýǵa ótinish aıtyldy.
«Men óz otbasym men bala-shaǵamnan qashyp ketedi dep oılaısyzdar ma? Meni bosatyńyzdarshy, ótinemin!» - dep aıqaılady Murat Asqaroǵly.
Eske sala keteıik, qaıǵyly oqıǵa byltyr 16 shilde kúni Odesskaıa men Brıanskaıa kósheleriniń qıylysynda bolǵan. Turǵyndar tal túbinen 4,5 jasar balany taýyp alǵan. Bala shala-jansar kúıinde shuǵyl aýrýhanaǵa jetkizilip, ota jasaldy. Almaty polıtsııasy jantúrshigerlik oqıǵaǵa kúdikti retinde balanyń ákesin ustady. Murat Asqaroǵly óziniń kinásin moıyndap, qazaqstandyqtardan keshirim suraǵan bolatyn.
Er adam mastyqtan eseńgirep turǵanda balasynyń qyńqyl-syńqylyn kótere almaı, taspen samaıynan bir-aq urǵanyn aıtqan. Qalalyq mamandandyrylǵan qylmystyq sot Murat Asqaroǵlyn QR QK 24-babynyń 3-bólimi jáne 99-babynyń 2-bólimi boıynsha qamaýǵa aldy.
