Balasynyń balabaqshadaǵy kezegin saryla tosyp júrgen ata-ana, balasy bir jarym aı boıy resmı túrde balabaqshaǵa baryp júrgendigin mınıstrden bildi
ASTANA. Qyrkúıektiń 13-i. QazAqparat /Gúlmıra Álıakparova/ - Balasynyń balabaqshadaǵy kezegin saryla tosyp júrgen temirtaýlyq ata-ana, QR Bilim jáne ǵylym mınıstri Janseıit Túımebaevtan olardyń balalary resmı tirkeý boıynsha bir jarym aı boıy balabaqshaǵa baryp júrgendigin bildi.
Bilim mınıstri J.Túımebaevtyń jeke blogyna hat jazǵan Qaraǵandy oblysy Temirtaý qalasynyń turǵyny Natalıa Saltaeva, balasyn balabaqshaǵa ornalastyrýda tap bolǵan problemany sheshýge qolǵabys kórsetýdi ótingen.
«Meniń qyzym Polına Kosterenkoǵa 2 jyl 10 aı toldy. Temirtaý qalasynyń №2-shi balabaqshasyna kezekke bala dúnıege kelisimen tirkeldik. 2010 jylǵy maýsymnyń 1-indegi jaǵdaı boıynsha biz kezekte 36-shy orynda turmyz. Bizdiń №2-shi balabaqshaǵa 25 búldirshinnen 2 top qabyldandy. Meniń qyzym solardyń qataryna enýi kerek edi. Biraq olaı bolmady. Oryndardy úlestirýmen aınalysqan komıssııadan buǵan qatysty mardymdy jaýap ala almadym. Onyń ústine, biz qazir neshinshi orynda turǵanymyzdy bile almaı otyrmyz. Esesine, olar 500 dollarǵa balany balabaqshaǵa ornalastyryp bere alatyndyqtaryn ashyp aıtty», delingen onyń hatynda.
Ananyń bul saýalyna Bilim mınıstri: «Qaraǵandy oblystyq Bilim basqarmasynyń málimetterine sáıkes, 2007 jylǵy shildeniń 17-sinde týǵan Polına Kostenko, 2010 jylǵy tamyzdyń 16-synan bastap resmı túrde Temirtaý qalasyndaǵy «№2 Juldyz balabaqshasy» kommýnaldyq memlekettik- qazynalyq kásipornyna baryp júr», dep qysqa ǵana jaýap qaıyrǵan.
