Balasynan aırylǵan ana almatylyq dárigerlerdi aıyptap otyr
ALMATY. QazAqparat - Almatyda Danat esimdi 3 jasar ulynan aırylǵan Natalıa Kım almatylyq dárigerlerdi aıyptap otyr. Qaıǵy jutqan ana QazAqparat tilshisine dárigerlerdiń resmı málimdesimen kelispeıtinin aıtty.
Natalıanyń aıtýynsha, 17 tamyzda 3 jastaǵy Danat qulap kókiregin aýyrtyp alǵan. Sol kúni travmatolog dáriger rentgenge túsirmeı úıge qaıtaryp jibergen. Bala ózi de jelsheshek (vetrıanaıa ospa) juqpasymen aýyryp júrgen.
«Túski úsh shamasynda balamnyń demalysy qıyndaı bastady. Balam maǵan quladym degen. Biraq, men ózim kórmedim. Qoltyǵynyń asty isinip ketti. Jedel járdemmen Manas kóshesindegi aýrýhanaǵa keldik. Bul jerden bizdi vetrıanka bolǵandyqtan, juqpaly aýrýlar aýrýhanasyna jiberdi. Juqpaly aýrýlar aýrýhanasynda dárigerlerdi 1,5 saǵattaı kúttik. Olar bizdi rentgenge jiberip, rentgen paraǵyna qarap, pnevmotoraks degen dıagnoz qoıyp, «muny hırýrgter emdeýi kerek» dep hırýrgııaǵa qaıta jiberdi. Hırýrgııa men reanımatsııa bizdi jelsheshek úshin qabyldaǵysy kelmedi. Sosyn bronhopnevmonııa degen dıagnoz qoıyldy. Juqpaly aýrýlar aýrýhanasynda bizdi arnaıy boksqa ornalastyrdy. Birazdan soń dáriger balanyń qabyrǵasy synǵan dedi», - dedi Natalıa Kım.
Anasynyń aıtýynsha, dárigerler balanyń kishi dáretiniń júrmegenine qatty alańdaýshylyq bildirgen.
Olar balaǵa qant qosylǵan sý men dáret júrgizetin tabletka bergen. Azdan soń tamyrdan qan almaq bolǵan medbıkeler de qan júrmegendikten qan ala almaı qınalǵan.
«Sol túni balam túnde turyp, júrdi. Al kelesi kúni turǵanda júrip-turýy qıyndady. Tańǵy 10 shamasynda erinderi kógere bastady. Medbıke dárigerdi shaqyryp kelgenshe balanyń demi toqtap qaldy. Júgirip jetken dárigerler meni syrtqa shyǵaryp jiberip, adrenalın salyp, júregine massaj jasaı bastady. Sol sátte de reanımatologtar vetrıanka úshin qabyldamaı jatty. Bir ýaqytta «jaraıdy, ákelińder» dedi. Sol kezde men ólip qalǵan balamdy aq mataǵa orap alyp medbıkeniń júgirip bara jatqanyn kórdim. Sosyn reanımatsııaǵa shaqyryp alyp balamnyń ólgenin aıtty», - dedi Natalıa.
Qaıǵy jutqan otbasy balasyna reanımatsııalyq sharalar der kezinde jasalsa, aman alyp qalýǵa bolar edi dep sanaıdy.
«Balamnyń ólimi neden bolǵany anyqtaldy. Qusyq tynys joldaryn bitep qalǵan. Eger balamdy birde hırýrgııaǵa, birde boksqa sendeltpeı, birden reanımatsııaǵa kóterse, arnaıy apparatqa qosýly bolsa, ony aman alyp qalýǵa bolar edi. Biz 4 saǵat ýaqytty joǵaltyp aldyq», - dedi anasy.
Tergeý kezinde Natalıa Kım birqatar derektiń ózgerip ketkenine tań qaldy.
«Bala 19 tamyzda saǵat 11:20-da qaıtys boldy. Al dárigerler tergeýshilerge basqa ýaqytty aıtqan. Olar sol sátte-aq oper grýppany shaqyrý kerek bolatyn. Olaı etpeı bir táýlik ustady. Aýrý tarıhyn da dárigerler qaıta jazyp shyqqan. Onda bala reanımatsııaǵa muqtaj emes dep jazylǵan. Onda demikpe bolmady degen. Biraq, bala aýanyń jetpeýinen qaıtys boldy ǵoı», - dedi ol.
Dárigerlerdiń ózderi keıin balanyń anasymen kelisimge kelmek bolǵan.
Ol úshin otbasyn tegin qarap berýdi, moraldy, materıaldy shyǵyndy óteýdi usynǵan.
«Qyrkúıekte maǵan eki áıel keldi. Juqpaly aýrýlar aýrhanasy bas dárigeriniń eki orynbasary maǵan kóńil aıtyp, aryzymdy qaıtaryp alýymdy surady. Olar balamnyń ómirin alyp qalý úshin baryn jasaǵandaryn aıtty. Biraq, meniń oıymsha dárigerler eshteńe istegen joq. Tipti ÝZI jasalǵan joq. Sizdiń balańyzdyń ólimine kináli emespiz dep, moraldy, materıaldy kómek usyndy. Otbasyńyzdy, eki balańyzdy tegin qarap beremiz dedi. Men qalaı aryzdandym. Solaı olar kele bastady. Oǵan deıin bir habar bolmaǵan. Men Bas prokýratýraǵa, QR ІІM, Balalardyń quqyqtaryn qorǵaý komıtetine jazdym. Aıyptylar jazasyn alýy kerek», - dedi anasy.
Qazir bul is QR ІІM, Bas prokýratýranyń qaraýynda jatyr.
Atalǵan oqıǵaǵa qatysty Almaty qalalyq Densaýlyq saqtaý basqarmasynyń óz ýáji bar.
«Keýde tusy jaraqat alyp, aǵzasy juqpanyń kesirinen ıntoksıkatsııaǵa ushyraǵan. Kishkentaı patsıent kezekshi dáriger men reanımatolog dárigerdiń baqylaýynda bolǵan. Alaıda, jasalǵan barlyq em-sharalarǵa qaramastan 19 tamyzda balanyń jaǵdaıy nasharlaı túsken. Dárigerler balanyń janyn arashalap qalý úshin 16 saǵat kúresti. Soǵan qaramastan balanyń qan aınalymy toqtap, kóz jumdy», - dedi basqarma ókilderi.
Buǵan deıin habarlaǵanymyzdaı, polıtsııanyń tapsyrmasymen qalalyq Qoǵamdyq densaýlyqty saqtaý departamenti ınfektsııalyq aýrýhanany kezekten tys tekserýdi bastady. Tergeý organdary aýrýhanada balanyń neden kóz jumǵanyn anyqtaý úshin arnaıy sot-medıtsınalyq saraptama taǵaıyndady.
