Balasyna vaktsına jasaýdan bas tartqan ata-ana onyń densaýlyq quqyqtaryn shekteıdi - Eljan Birtanov

NUR-SULTAN. QazAqparat - Ata-analar balasyn vaktsınatsııalaýdan bas tartý arqyly onyń densaýlyq quqyqtaryn shekteıdi. Bul týraly QR Parlamenti Senatynyń jalpy otyrysynda QR Densaýlyq saqtaý mınıstri Eljan Birtanov aıtty, dep habarlaıdy QazAqparat tilshisi.

«Ata-analar balasyn vaktsınatsııalaýdan bas tarta otyryp, balanyń densaýlyq quqyqtaryn shekteıtindigin atap ótken jón. Jalpy, egilmegen adam sanynyń ósýi – ujymdyq ımmýnıtettiń tómendeýine jáne halyqtyń arasynda vaktsınamen basqarylatyn ınfektsııalyq aýrýlardyń taralýyna alyp keledi», - dedi «Halyq densaýlyǵy jáne densaýlyq saqtaý júıesi týraly» kodeks pen «Keıbir zańnamalyq aktilerge densaýlyq saqtaý máseleleri boıynsha túzetýler engizý jóninde» ilespe zań jobasyn tanystyrǵan mınıstr.

Onyń dereginshe, 2019 jyly qyzylsha aýrýymen aýyrǵandardyń arasynda 21 ólim, onyń ishinde 19 bala ólimi tirkelgen. Elimizde qyzylshanyń órshýi kezinde 13 800-den astam jaǵdaı, balalar arasynda – 9 887 jaǵdaı tirkeldi. Syrqattanýshylyqtyń 83,4 paıyzy egilmegen balalardyń arasynda tirkeldi. 2018 jylǵy 1 qarashadan bastap 2019 jylǵy 31 jeltoqsanǵa deıin – 8 244 bala aýyrdy.

«Halyq arasynda vaktsınamen basqarylatyn ınfektsııalar jaǵdaılaryn tirkeý osal toptarǵa jatatyn balalardyń ómirine qaýip tóndiredi. Sonymen qatar, atalǵan normany jurtshylyqpen talqylaý nátıjesinde profılaktıkalyq ekpeler mindetti jáne erikti bolyp bólindi. Mindetti profılaktıkalyq egýlerge josparly profılaktıkalyq egýler jáne epıdemıologııalyq kórsetilimder boıynsha profılaktıkalyq egýler jatady. Josparly vaktsına almaǵan balalardy mektepke deıingi oqý mekemelerine jiberý – ujymdyq ımmýnıtettiń shekti deńgeıine jetken jaǵdaıda ǵana múmkin bolady», - dedi Eljan Birtanov.