Balasyna vaktsına salǵyzbaıtyn ata-analar kóbeıýde

ASTANA. QazAqparat – Sońǵy jyldary 6 myńnan astam ata-ana balalaryn vaktsınalaýdan bas tartqan. Bul týraly Sanıtarııalyq-epıdemıologııalyq baqylaý komıteti Vaktsınamen basqarylatyn ınfektsııalardy baqylaý basqarmasynyń basshysy Nurshaı Ázimbaeva aıtyp berdi, dep habarlaıdy QazAqparat tilshisi.

«Biz jyl saıyn monıtorıng júrgizemiz jáne ókinishke oraı, sońǵy jyldary vaktsınadan bas tartqan turǵyndardyń sany artqan. Sońǵy jyldary 6 myńnan astam ata-ana balalaryn vaktsınalaýdan bas tartqan. Degenmen biz óz tarapymyzdan túsindirý jumystaryn júrgizip jatyrmyz, óıtkeni vaktsınadan bas tartqan ata-ana ınfektsııalardyń qandaı aýyr ekenin, onyń saldary qandaı ekenin túsinbeıdi. Biz olardyń vaktsınadan bas tartýynyń sebebin anyqtaımyz. Barlyq faktorlardy eskere otyryp, teologtardy da dinı turǵydan túsindirý jumystaryna qosamyz», - dedi N. Ázimbaeva Ortalyq kommýnıkatsııalar qyzmetinde ótken baspasóz máslıhatynda.

«Astana medıtsına ýnıversıteti» AQ balalar juqpaly aýrýlary kafedrasynyń meńgerýshisi Dınagúl Baeshevanyń aıtýynsha, qyzamyq aýrýy taraǵanda qanshama bala aýyrdy jáne qaıtys bolǵandary da bar. Kóptegen bala múgedek bolyp qaldy.

«Koronavırýsty alsaq ta, qansha adam reanımatsııada bolǵanyn, qansha adam qaıtys bolǵanyn tekserdik. Munda vaktsına alǵan birde-bir adam qaıtys bolǵan joq. Bul vaktsınadan keıin aýyrmaıtynyńyzdy bildirmeıdi, degenmen aýrý jeńilirek bolady», - dep túsindirdi Dınagúl Baesheva.