Balasyn jumys istetý úshin ata-anasy ony sotqa bergen
ASTANA. QazAqparat - Qytaıda 29 jastaǵy jigit ata-anasynyń tapqan-taıanǵanyna kún kórip, eshqashan jumys istemegen. Egde jastaǵy erli-zaıypty ulynyń aıtqanyn oryndaýǵa tyrysqan, alaıda uldary úılerine ózimen birge jumys istemeıtin qalyńdyǵyn alyp kelgende, olardyń shydamy taýsylǵan. Bul týraly Day.Az habarlady.
Qytaı otbasyndaǵy bul oqıǵa jalǵyz ul - Tsınniń ýnıversıtettegi oqýyn tastap ketýinen keıin bastalǵan, dep jazady Oddity Central. Sol kezden beri anasy Sıýı Sın ulynyń qas-qabaǵyna qarap, tamaǵyn ázirlep, kıimderin jýyp otyrǵan al balasy bul ýaqytta kúnimen uıyqtap, noýtbýkta otyryp, ınternette kúnin jaı ótkizgen. Ákesi Ký ulyna jumys tapqan kezde Tsın ol jerde nebári úsh aıǵa shydaǵan.
Kóp ýaqyt ótpeı 29 jastaǵy qytaılyq jumyssyz áıelmen tanysyp, bir aıdan keıin ony úıge alyp kelgen. Ulymen birge, onyń janyndaǵy áıeldiń de tamaǵyn istep, sońynan kirin jýyp, bar jaǵdaıyn jasaý kerektigin kórgen ata-ananyń amaly taýsylǵan. Sharasy quryǵan ata-ana uldary Tsınge onyń ne jumysqa ornalasatynyn, ne qasyndaǵy qyzben úıinen ketsin degen talap qoıǵan. Alaıda olardyń bul sózine ne uly, ne onyń qasyndaǵy qyz qulaq aspaǵan. Sol kezde ata-anasy sotqa shaǵymdanýǵa májbúr bolǵan.
Іstiń mánisin anyqtaǵannan keıin sýdıa shaǵymdanýshylardyń paıdasyna sheshim shyǵardy. Ol eńbekke jaramdy uldyń jumys tabýy kerek ekenin habarlady.
Alaıda jumyssyz jup sot sheshimine qulaq aspaı,burynǵy ádetterin tastamaǵan. Tipti sot sheshimi shyqqannan keıin 60 kún ótse de, oryndarynan qozǵalmaǵan.
Amaly quryǵan ata-ana balasy men onyń qasyndaǵy qyzdy sot prıstavtarynynń kómegimen úıden shyǵarý úshin qaıtadan sotqa shaǵymdanǵan.
Osy oqıǵa qytaı basylymdarynda keń taraldy. Qazir osy sııaqty oqıǵalardyń qaıtalanýy Qytaıdaǵy bir bala saıasatynyń saldary dep baǵalanyp otyr.
