Balasyn uryp taldyrǵan ákeniń sotynda shý shyqty
ALMATY. QazAqparat – Almatyda 4,5 jastaǵy ulyn uryp taldyrdy degen kúdikpen ustalǵan áke Murat Asqaroǵlyǵa qatysty sot úkimi bolmaı qaldy, dep habarlaıdy QazAqparat tilshisi.
Sot aldynda óz balasyn uryp óltirmek boldy degen kúdikpen ákesi jaýap berip jatyr.
Jaryssóz kezinde prokýror ony 11 jyl 3 aı bas bostandyǵynan aıyrý týraly jaza suraǵan bolatyn.
Sot úkimi alqa bıler qatysýymen ótti. Sýdıa úkimdi oqı bastaǵan sátte týystary aıǵaı-shý kóterip jiberdi. Sondyqtan, sýdıa zaldan shyǵyp ketýge májbúr boldy.
Eske sala keteıik, qaıǵyly oqıǵa 16 shilde kúni Odesskaıa men Brıanskaıa kósheleriniń qıylysynda boldy. Turǵyndar tal túbinen 4,5 jasar balany taýyp alǵan. Bala shala-jansar kúıinde shuǵyl aýrýhanaǵa jetkizilip, ota jasaldy.
Almaty polıtsııasy jantúrshigerlik oqıǵaǵa kúdikti retinde balanyń ákesin ustady. Murat Asqaroǵly óziniń kinásin moıyndap, qazaqstandyqtardan keshirim surady.
Er adam mastyqtan eseńgirep turǵanda balasynyń qyńqyl-syńqylyn kótere almaı, taspen samaıynan bir-aq urǵan.
Murat Asqaroǵly QR QK 99-babynyń 2-bólimi 3-tarmaǵymen («Dármensiz adamdy óltirýge oqtalǵany úshin») jáne QR QK 24-babynyń 3-bólimimen aıyptalýda.
Sýdıa bul isti toqtatyp, qaıta tergeýge jibergen bolatyn.
Bıyl sáýirde is qaıta jalǵasty.
