Balasyn taspen uryp taldyrǵan ákeniń soty: kýágerler suraldy

Búgingi otyrys barysynda birneshe kýáger suraldy. Olardyń biri sol kúni jol apatyn kórgenin aıtty.

Nargız Pashaeva mekteptegi jumysyna avtobýspen bara jatqanda jolda kólik apaty bolǵanyn kórgen. Jolda avtobýsty polıtsııa toqtatyp, jol apatyn kórgender bar ma dep suraǵan. Alaıda jolaýshylardyń barlyǵy úndemeı qaldy.

«Úıden shyqtym. Aıaldamada 5-6 mınýt avtobýs kútip turdym. №37 avtobýsqa otyrǵan soń 200 metr qashyqtyqtan soń joldyń sol jaǵynan úlken qara mashınany kórdim. Qasynda eki adam boldy. Jerde kishkentaı bala jatty. Jol polıtsııasy da boldy. Biraq, olar alysta turdy. Úıge kelgen soń bárin úıdegilerge aıtyp berdim. Sol kúni jumystan keshiktim», - dedi Nargız Pashaeva.

Sonymen qatar, sotta saraptama organynyń qyzmetkerinen jaýap alyndy. Tergeý materıaldary boıynsha molekýlıarly genetıkalyq saraptama qorytyndysymen tanystyrdy.

«Japa shekken bala men sottalýshynyń qan tobynyń úlgisin molekýlıarly saraptamadan ótkizdik. DNQ nátıjesi kórsetkendeı, tas pen velosıpedtegi qan balanyki bolyp shyqty. Al bul zattarda sottalýshynyń qan úlgisi joq», - dedi saraptama qyzmetiniń qyzmetkeri.

Murat Asqaroǵly QR QK 99-babynyń 2-bólimi 3-tarmaǵymen (dármensiz adamdy óltirýge oqtalǵany úshin) jáne QR QK 24-babynyń 3-bólimimen aıyptalyp jatyr.

Qylmystyq is 6 tomnan turady. Sot barysynda 6 kýáger suralady.

Eske sala keteıik, qaıǵyly oqıǵa 16 shilde kúni Odesskaıa men Brıanskaıa kósheleriniń qıylysynda boldy. Turǵyndar tal túbinen 4,5 jasar balany taýyp alǵan. Bala shala-jansar kúıinde shuǵyl aýrýhanaǵa jetkizilip, ota jasaldy. Almaty polıtsııasy jantúrshigerlik oqıǵaǵa kúdikti retinde balanyń ákesin ustady. Murat Asqarogly óziniń kinásin moıyndap, qazaqstandyqtardan keshirim surady. Er adam mastyqtan eseńgirep turǵanda balasynyń qyńqyl-syńqylyn kótere almaı, taspen samaıynan bir-aq urǵan.

Qalalyq mamandandyrylǵan qylmystyq sot Murat Asqaroǵlyn QR QK 24-babynyń 3-bólimi jáne 99-babynyń 2-bólimi boıynsha qamaýǵa alǵan bolatyn.