Balasyn taspen urdy dep kúdikke ilingen ákeniń soty qaıta jalǵasty
ALMATY. QazAqparat - Almatyda balasyn taspen uryp taldyryp, tastap ketti dep kúdikke ilingen Murat Asqaroǵlynyń soty qaıta jalǵasty, dep habarlaıdy QazAqparat tilshisi.
Іsti qylmystyq ister boıynsha aýdanaralyq mamandandyrylǵan soty qarap jatyr. Murat Asqaroǵly QR QK 99-babynyń 2-bólimi 3-tarmaǵymen («Dármensiz adamdy óltirýge oqtalǵany úshin») jáne QR QK 24-babynyń 3-bólimimen aıyptalýda.
Qylmystyq is 6 tomnan turady. Sot barysynda 6 kýáger suralady.
«Eger meniń kinám dáleldense, baıaǵyda sottalatyn edim. Men mynda 9 aıdan beri otyrmyn. Meniń sózime kúmándansańyzdar, balamnan surańyzdar. Odan psıhologtar jaýap alsyn. Balanyń jaýabynan-aq bárin túsinýge bolady. Men mynda zańsyz otyrmyn. Qalaısha óz balamdy ózim uramyn?», - dedi Murat Asqaroǵly.
Aıta ketý kerek, sot otyrysyna kelmegen Asqaroǵlynyń advokaty Nurlan Óstemirov aldyn ala tyńdalymdy 15 sáýirge deıin jyljytýdy suraǵan. Alaıda, sýdıa zańnamaǵa sáıkes mundaı isti osyndaı uzaq merzimge jyljytýǵa quqyǵy joqtyǵyn alǵa tartty. Odan keıin Asqaroǵlyǵa qorǵaýshysy kelgenshe memlekettik advokat jaldaý jóninde usynys bildirdi.
Kelesi sot otyrysy 8 sáýir, saǵat 16:30-ǵa belgilendi.
Eske sala keteıik, qaıǵyly oqıǵa 16 shilde kúni Odesskaıa men Brıanskaıa kósheleriniń qıylysynda bolǵan. Turǵyndar tal túbinen 4,5 jasar balany taýyp alǵan. Bala shala-jansar kúıinde shuǵyl aýrýhanaǵa jetkizilip, ota jasaldy. Almaty polıtsııasy jantúrshigerlik oqıǵaǵa kúdikti retinde balanyń ákesin ustady. Murat Asqaroǵly óziniń kinásin moıyndap, qazaqstandyqtardan keshirim suraǵan bolatyn. Er adam mastyqtan eseńgirep turǵanda balasynyń qyńqyl-syńqylyn kótere almaı, taspen samaıynan bir-aq urǵanyn aıtqan. Qalalyq mamandandyrylǵan qylmystyq sot Murat Asqaroǵlyn QR QK 24-babynyń 3-bólimi jáne 99-babynyń 2-bólimi boıynsha qamaýǵa aldy.
