Balasyn óli bosanǵan aqtóbelik kelinshek dárigerlerdiń salǵyrttyǵyna renishin bildirdi
AQTÓBE. QazAqparat - Aqtóbede jas ana Asylzat Turar balasyn óli bosandy. Júktilik kezinde aýyrmaǵan, ýchaskelik dárigerlerdiń únemi baqylaýynda bolǵan kelinshek dárigerlerdiń salǵyrttyǵyna renishin bildirdi, dep habarlaıdy QazAqparat tilshisi.
Asylzat Turar qazir Aqtóbe oblystyq perenataldyq ortalyqta em qabyldap jatyr. Júktilik kezinde aýyrmaǵan jas ana 17 saǵattan soń balasyn óli týǵanyn aıtyp, dárigerlerdiń salǵyrttyǵyna renishin bildirdi.
«Perzenthana kelgen kezde 24 saǵat kútý qajet degen qujatqa qol qoıdyryp aldy. Túnde qınalyp, kezekshi dárigerge habar berdim. Ol tańǵa deıin kútýge keńes berdi. Túni boıy uıyqtamaı, dálizde júrdim. Sol kezde medbıke uıyqtap jatty. Ony oıatpadym. Keıin qatty qınalyp, kómek suradym. Kezekshi medbıke qujatqa qol qoıǵanymdy aıtyp, kútý qajet ekenin eskertti», - dedi Asylzat Turar. Sol kúni tańda ÝDZ jasalyp, balanyń júregi soqpaı turǵany anyqtalǵan.
«2 qyrkúıek kúni kelinim jedel járdemmen perzenthanaǵa tústi. №1 perenataldyq ortalyq dárigerleriniń baqylaýda boldy. 3 qyrkúıek kúni telefon shalyp, «shetinep ketti» dep habar berdi. Men perzenthanaǵa kelip, dárigerlerden sebebin suradym. Olar túnimen baqylaý júrgizgenin, tańǵy saǵat 5:00-de balanyń júregi soǵyp turǵanyn aıtty. Eki saǵattan keıin teksergen kezde balanyń júregi toqtap qalǵany anyqtalǵan. Kelinim qınalǵan kezde dárigerlerge baryp, aıtady, dárigerler 3-4 saǵat kútýin eskertedi. «Nege uıyqtaıdy?» dep bas dárigerden suraǵanymda «uıyqtaýy kerek» dep jaýap berdi. Kóńilim qaldy? Endi Aqtóbe oblystyq densaýlyq saqtaý basqarmasyna shaǵymdanamyz», - dedi Asylzat Turardyń enesi Aqqanat Qazaqova.
Jas ana Asylhat Turar Aqtóbe oblysy Shalqar aýdanyndaǵy týǵan anasyna saǵat saıyn habarlasyp turǵan.
«Saǵat saıyn qyzyma habarlasyp, jaǵdaıyn bilip otyrmyn. Dáriger sol kúni uıyqtap jatqan eken. Oıatady, biraq «ornyńa jat» dep esh shara qoldanbaǵan, ýaqyty bolmady dep aıtqan. Bala túnshyǵyp ólgen. Biz dáriger emespin, biraq anamyz, mán-jaıdy bilemiz. Ana men bala qaralmaǵan», - dedi Janat Omarova.
Qazirgi ýaqytta ortalyqta arnaıy komıssııa qurylyp, bala óliminiń mán-jaıy anyqtalyp jatyr. Birneshe saraptama taǵaıyndaldy.
«Perzenthanaǵa túsken Asylzat Turardyń bul ekinshi balasy. Bosanýshydan gıpoplazııa anyqtaldy. Bul degenimiz bala joldasynyń kólemi men salmaǵy kishkentaı bolǵan. Bizge túsken kezde kúni jetilmedi, anadan sý ketti. Klınıkalyq talap boıynsha 24 saǵat kútýimiz qajet. Sol aralyqta áıeldi baqylap, bosanýǵa daıyndyq júredi. Sharanyń bári qoldanylǵan. Áıel men balanyń jaǵdaıy qalypty boldy. Arada 17 saǵat ótkende tolǵaq bastalǵan. Sol kezde balanyń júrek soǵysy estilmeı qalǵan. Gıstologııalyq saraptama taǵaıyndaldy», - dedi oblystyq perınataldyq ortalyq dırektorynyń emdeý isi jónindegi orynbasar Sántaı Berjanova.
Aıta keteıik, №1 perenataldyq ortalyqta jyl basynan beri 13 bala shetinep ketken. Sonymen qatar, 38 bala ana jatyrynda jatyp, júregi soqpaı qalǵan. Bul perenataldyq ortalyq óńirdegi júktiligi túrli potologııalyq jaǵdaılarmen órbigen, ana men bala densaýlyǵynda aqaýy bar naýqastardy qabyldaıdy.
