Balasyn kóterip alǵan: Otbasy karantınnen shatyr arqyly qashqan
EKІBASTUZ. QazAqparat – Ekibastuzda karantın tártibin óreskel buzǵan úsh azamat ustaldy, dep habarlaıdy QazAqparat tilshisi Іshki ister mınıstrliginiń baspasóz qyzmetine silteme jasap.
Naqtyraq aıtqanda, 34 jastaǵy er adam karantınge jabylǵan turǵyn úıdiń birinshi qabatyndaǵy terezesinen sekirip túsip, qashpaq bolǵan. Alaıda, ol avtokóligine deıin jetip úlgermepti. Polıtsııa ony birden ustap, turatyn úıine qaıta jetkizgen. Al avtokóligin aıyp turaǵyna alyp ketken.
Ekibastuzda taǵy bir jaǵdaı tirkelgen. Karantınge jabylǵan M.Júsipov kóshesi, 61-úıden bir otbasy shatyr arqyly qashpaq bolǵan.
«Er adam kámeletke tolmaǵan qyzyn kóterip alǵan. Alaıda olardyń bul áreketteri kýágerdiń kamerasyna túsip qaldy. Karantın rejımi men tótenshe jaǵdaı tártibin buzǵany úshin QR ÁQBjK 476-baby boıynsha ákimshilik is qozǵaldy», - dep habarlady mınıstrlikten.
Jalpy Pavlodar oblysynda tártip saqshylary karantın rejımin buzýdyń 1020 jaǵdaıyn anyqtaǵan. Bári de joǵaryda atalǵandaı 476-shy bap boıynsha ákimshilik jazaǵa tartylǵan.
«Sot sheshimimen 96 adam 5-ten 10 kúnge deıingi ákimshilik qamaýǵa alynsa, 199 adamǵa 10 AEK kóleminde aıyppul salyndy. 585 adam eskertý aldy. 412 kólik aıyp turaǵyna jetkizildi», - delingen habarlamada.
