Balasyn grantqa túsirmek bolǵan aqtóbelik 1,3 mln teńgesinen aıyryldy
AQTÓBE. QazAqparat – Aqtóbe qalasynyń turǵyny polıtsııadan kómek surady. Ol balasyn grantqa oqýǵa túsirmek bolyp, 1,3 mıllıon teńge aqshasynan aıyryldy, dep habarlaıdy QazAqparat tilshisi.
Aqtóbe qalasynyń 40 jastaǵy turǵyny alaıaqtyń qurbany boldy. Ol 2- shilde kúni beıtanys adamǵa qolynda bar aqshasyn ustatyp jibergen.
«40 jastaǵy aqtóbelik beıtanys adammen dámhanada kezdesip, kelisken. Kúdikti qaladaǵy ýnıversıtetteriniń birine «aqysyz bólimge» oqýǵa túsýge járdemdesetinin aıtyp, qyzmeti úshin 1 300 000 teńge kóleminde syıaqy aldy. Jedel-izdestirý barysynda polıtsııa qyzmetkerleri kúdiktiniń jeke basyn anyqtady. Ol Aqtóbe qalasynyń 44 jastaǵy turǵyny bolyp shyqty», - dep habarlady oblystyq PD baspasóz qyzmeti.
Qazirgi ýaqytta Qylmystyq kodekstiń «Alaıaqtyq» baby boıynsha qylmystyq is qozǵalyp, tergeý bastaldy.
