Balasyn betonǵa laqtyryp jibergen pavlodarlyqqa qatysty sot úkimi shyqty
PAVLODAR. QazAqparat - Alty jasar balasyn uryp, betonǵa tastaı salǵan pavlodarlyqqa bir jyl bas bostandyǵynan aıyrý jazasy kesildi, dep habarlaıdy «QazAqparat» HAA tilshisi.
Sot úkimi boıynsha, 41 jastaǵy azamat bir jyl bas bostandyǵynan aıyrylyp qana qoımaı, 100 saǵattyq májbúrli eńbekke tartylyp, zardap shekken balanyń otbasyna 200 myń teńge aıyppul tóleıtin bolady. Polıtsııa qyzmetkerleri Tólegen Jumabaevty ustaǵanymen, qylmystyq is prokýratýranyń tekserýinen keıin ǵana qozǵaldy. Buǵan deıin azamat bostandyqta boldy. Jumabaev sotqa mas kúıde kelgennen keıin, ony qamaýǵa aldy. Bul onyń besinshi ret sotty bolýy. Ol Baıanaýyl aýdanynan Pavlodardaǵy týysqandaryna kelgen. Alty jasar Savelıı Orlovqa jasalǵan qastandyqtan keıin balanyń densaýlyǵyn qalpyna keltirýge áli uzaq ýaqyt kerek.
«Kózin jıi jypylyqtatyp, túni boıy birneshe ret shoshynyp oıanady. Qazir biraz túzeldi. Biraq áli birneshe ret psıhologqa barýymyz kerek.Buryn ol dalaǵa shyǵyp balalarmen oınaıtyn, qazir óıtpeıdi. Tek úlken aǵasymen erip júredi. Bóten adamdar kórse, júgirip úıge qaıtyp keledi», - deıdi onyń anasy Olesıa Orlova.
Er azamat 27 tamyz kúni Savelıı turatyn úıdiń aýlasynda balaǵa shabýyl jasaǵan bolatyn. Ol mas kúıde balany ustap alyp, ózinen asyra laqtyryp jibergen. Basymen betonǵa qulaǵan balanyń denesinen dárigerler daqtar men jaraqattar tapty. Onyń ústine psıhologııalyq turǵydan da qatty soqqy alǵan.
