Balasyn armatýramen urý oqıǵasy: Іsti polıtsııa baqylaýyna aldy
TALDYQORǴAN. QazAqparat - Ákesi balasyn armatýramen urdy degen is boıynsha tergeýdiń jan-jaqty júrgizilýin Almaty oblystyq polıtsııa departamentiniń basshylyǵy óz baqylaýyna aldy, dep habarlaıdy QazAqparat tilshisi.
«Bul is boıynsha QR Qylmystyq kodeksiniń 140-babyna sáıkes sotqa deıingi tergeý amaldary bastaldy. Qazirgi ýaqytta balanyń ákesiniń mekenjaıy anyqtalyp, aýdandyq polıtsııa basqarmasyna jetkizildi. Odan oqıǵaǵa qatysty tıisti jaýap alyndy. Sonymen qatar, jedel izdestirý sharalary barysynda polıtseıler balanyń anasyn da izdep tapty. Tergeý isin Almaty oblysy Polıtsııa departamentiniń basshylyǵy óz baqylaýyna aldy»,-dedi Almaty oblystyq Polıtsııa departamentiniń baspasóz qyzmetinen.
Oqıǵa Almaty oblysyndaǵy Eńbekshiqazaq aýdanynda bolǵan.
Esterińizge sala keteıik, buǵan deıin áleýmettik jelide 8 jastaǵy balany ákesi armatýramen urǵany baıandalǵan vıdeo taraǵanyn habarlaǵan bolatynbyz. Balanyń ómirine arasha túsken jýrnalıst Gúlmıra Abyqaı mundaı bassyzdyqty «otbasylyq kıkiljiń» dep qaramaýdy suraıdy.
«8 jasar balany óz ákesi armatýramen uryp, ólimshi kúıge jetkizgen. Anasy da dál osyndaı kúıde bas saýǵalap qashyp ketken. Almaty oblystyq aýrýhanaǵa túsken bala «Kómektesińizshi!!! Ákemdi 20 jylǵa qamaýǵa bola ma?» dep jalynady. Erteń aýrýhanadan shyqsa ony zań boıynsha jalǵyz týysy ákesine ǵana beredi» dep jazǵan jýrnalıst Gúlmıra Abyqaı óziniń facebook-tegi jeke paraqshasynda.
