Balasy Sırııada kóz jumǵan ana kelini men nemereleriniń taǵdyry týraly aıtty
«Osydan 2 jyl buryn Sırııada júrgen meniń ulym kóz jumdy. Qazir ol jerde meniń kelinim men úsh nemerem júr. Qazaqstanda 120 ana óziniń balalary sol jaqta júrgenin aıtty. 10 ananyń balalary men týystary qazir Sırııadan keldi. Meniń kelinim áli sonda. Kóptegen azamattar qazir ol jaqta qorshaýda qalyp otyr. Búgingi tańda olar sol qorshaýdan shyǵa almaýda. Bizge olardyń sol qorshaýdan shyqqany habarlanǵanymen, jetýi tıis jerge deıin jete almaı jatqany aıtylýda. Olar sol jerge jaıaý kele jatqan kórinedi. Qaqtyǵys oryn alyp jatqandyqtan, olar erkin shyǵa almaı jatyr. Sebebi, aýmaqtardyń kóbinde mınalar qoıylǵan», - deıdi Botagóz Maqatova QR SІM-de ótken baspasóz máslıhatynda.
Ol búgingi kúni kelini jáne nemerelerimen vatsap arqyly hbarlasyp otyrǵanyn aıtady.
«Áý basta meniń ulym dindi tolyq túsinbegendikten sol jaqtan bir-aq shyqqan. Balalarynyń bul jerde túk qatysy joq. Nemerelerim óziniń ata-anasymen bolǵan. Biz solardy qaıtarǵymyz keledi. Olardyń bári Qazaqstan azamattary jáne olar dindi bilmegendikten ómirden adasyp ketkenin, osyndaı jaıǵa tap bolǵanyn túsinip otyr», - deıdi ol.
Sátpaev qalasynyń turǵyny ulynyń Sırııaǵa ketip qalatynyn ózi bilmegenin aıtty.
«Ulym oqýǵa bara jatqanyn aıtqan edi. Aqyry, jarty jyldan keıin Sırııada bolyp shyqty. Ulym 2012 jyly ketip qalǵan. Kolledjde úshinshi kýrsta oqyp júrgen kezi bolatyn. Ol menen tek namaz oqýǵa ruqsat surady. Biz ol kezde mundaı jaǵdaımen betpe-bet keletinimizdi sezgen joq edik. Áý basta qarsy bolyp, bul qadamǵa áli jasyń saı kelmeıdi destik. Armııaǵa baryp kelgennen keıin kór dedik. Bálkim, ruqsat bergenimiz qate de bolǵan shyǵar, biraq men ony ózim jiti baqylap júrgen edim», - deıdi Botagóz.
Onyń aıtýynsha, uly bir dosymen birge Almatyǵa taýar alýǵa ketip qalǵan. Sol kúıi oralmapty.
«Ulym sol jaqqa ketip qalǵannan keıin komıtetke ony qaıtarý týraly ótishin jazdym. Biraq, ol kezde qandaı shara qoldaný kerektigin eshkim de bilmep edi. Ulymnyń sol jaqta Aqtóbeniń qyzyna (qazaq qyzyna) úılengenin bildim. 2016 jyly ulym qaıtys boldy. Qandaı jaǵdaı bolǵanyn bilmeımin. Áıeli onyń jerlenip jatqany túsirilgen vıdeony jiberdi. Ol jaqta soǵys bolyp jatqanda men qalaısha ony alyp keter edim...», - deıdi Botagóz.
Eske sala ketsek, keshe Memleket basshysy Nursultan Nazarbaev Sırııadan Qazaqstan azamattaryn evakýatsııalaý boıynsha gýmanıtarlyq operatsııaǵa baılanysty málimdeme jasaǵan bolatyn. Memleket basshysy atap ótkendeı, 6 qańtarda quqyq qorǵaý organdary men Syrtqy ister mınıstrligi júrgizgen gýmanıtarlyq shara nátıjesinde Sırııadan Qazaqstannyń 47 azamaty, sonyń ishinde 30 bala elge qaıtaryldy.
Sonymen birge, búgingi baspasóz máslıhatynda QR Syrtqy ister vıtse-mınıstri Erjan Ashyqbaev «Jýsan» operatsııasynan keıin de qaqtyǵys aımaqtarynda júrgen qazaqstandyqtardy Otanyna qaıtarý jumystary jalǵasatynyn habarlady.
