Balasy men ata-anasyn tastap ketý masqara qubylys dep baǵalanýy tıis - N. Nazarbaev
ASTANA. QazAqparat - Týǵan balasy men ata-anasyn tastap ketý sekildi áreketter dástúrimizge qaıshy. «Mereıli otbasy» ulttyq baıqaýynyń jeńimpazdaryn marapattaý rásiminde Memleket basshysy Nursultan Nazarbaev osylaı málim etti.
«Egde jastaǵy 7 myńnan astam adam qarttar úıinde ómir súrýde, al olardyń kóbiniń deni saý, tabysty balalary bar. Qartaıǵan ata-anasyn tastap ketý degen bizdiń dástúrimizde joq, jalpy bundaı túsinik bolmaǵan. Qoǵam týǵan balasy men ata-anasyn tastap ketý sekildi áreketterdi masqara qubylys retinde baǵalaýy tıis. Bul bizdiń janymyzǵa jat qubylys. Halqymyz ákeni asqar taýǵa balaǵan, eshqashan aldyn kesip ótpegen, «jumaq ananyń tabanynyń astynda» dep anasyn syılaǵan. «Bala baýyr etiń» dep urpaǵyna aıryqsha qamqorlyqpen qaraǵan. Qandaı jaýgershilik zamannyń ózinde jetimin jylatpaǵan, jesirin qańǵytpaǵan elmiz. Biz - qazaq osyndaımyz!», - dedi Memleket basshysy. Prezıdent ata-anasyn qarttar úıine tapsyratyn qatygez urpaq, balasynan jerıtin kókek ana halqymyzda eshqashan bolmaǵyndyǵyn atap ótti. «Bul bizdiń dástúrimizge qaıshy, saltymyzda joq áreket. Jastyq shaqta ata-anańa ne kórsetseń, qartaıǵanda óz urpaǵyńnan sony kóresiń. Ata-anańa qurmetpen qaraý, halyqty syılaý, urpaqqa qamqorlyq jasaý árbir adamnyń qasıetti boryshy emes pe?!», - dedi Elbasy.
