Balasy birneshe kún shuńqyrda bolǵan pavlodarlyq áıel 60 kúnge qamalýy múmkin
ASTANA. QazAqparat - Úsh kúnnen keıin tereńdigi eki metr shuńqyrdan tabylǵan Artýrdyń 42 jastaǵy anasy ákimshilik jáne qylmystyq jaýapkershilikke tartylady, dep habarlaıdy pavlodarnews.kz .
Pavlodar qalasynyń bilim berý bólimi kámeletke tolmaǵandardyń isteri jónindegi mamandandyrylǵan aýdanaralyq sotyna áıel adamdy ata-ana quqyǵynan aıyrý týraly aryzdandy.
«Artýrdyń anasyna QR ÁQBK-niń 127-baby, 1-tarmaǵy - «Ata-ananyń nemese basqa da zańdy ókilderdiń kámeletke tolmaǵan balalardy tárbıeleý men oqytý jónindegi mindetterdi oryndamaýy» boıynsha jeti aılyq eseptik kórsetkish mólsherinde jáne osy zańǵa sáıkes132-baby, 2-tarmaǵy - «Kámeletke tolmaǵandardyń túngi ýaqytta (saǵat 22-den tańǵy 6-ǵa deıin) zańdy ókilderiniń birge júrýinsiz oıyn-saýyq mekemelerinde bolýyna jol berý» boıynsha 30 aılyq eseptik kórsetkish mólsherinde aıyppul salynady», - dedi qalalyq prokýratýranyń bólim prokýrory Tımýr Qalın.
Sonymen qatar, Artýrdyń anasyna qatysty QR QK-niń 140-baby, 1-tarmaǵy «Kámeletke tolmaǵan adamdy tárbıeleý jónindegi mindetterdi oryndamaý» boıynsha qylmystyq is qozǵaldy. Nátıjesinde oǵan 200 AEK kóleminde aıyppul salynyp, 180 saǵatqa qoǵamdyq jumysqa tartylady nemese 60 kúnge qamalady.
«Qazirgi Artýr oblystyq balalar aýrýhanasynyń somatıka bóliminde jatyr. Erteń ony shyǵarady. Keıin ol balalar men jasóspirimderdi baspanasyna jiberiledi. Jalpy, óńirimizde ata-ana quqyǵynan aıyrylyp, balasyn qaıtarǵandar sırek kezdesedi», - deıdi qalalyq bilim basqarmasynyń qorǵanshylyq sektorynyń meńgerýshisi Orynbasary Temirbolatova.
