Balasy 1-synypqa baratyn ata-analar qandaı medıtsınalyq qujattar jınaýy kerek

ALMATY. QazAqparat – Balalar birinshi synypqa barýy úshin qaı dárigerdiń tekserisinen ótip, qandaı analızder tapsyrýy kerek? Bul týraly Almaty qalalyq №11 emhananyń oqýshylardyń densaýlyǵyn qorǵaý ortalyǵynyń meńgerýshisi Álııa Sáýkimbekova aıtyp berdi, dep habarlaıdy QazAqparat tilshisi.

Dárigerdiń sózinshe, balalardy birinshi synypqa qabyldaý úshin eki medıtsınalyq qujat kerek.

Olar: balanyń densaýlyq pasporty (026/ý-3 nysany) jáne ekpe pasporty (065/ý nysany).

«Mektep aldyndaǵy josparly medıtsınalyq tekserý balalardyń turǵylyqty jeri boıynsha emhanada júrgiziledi. Birinshiden, ata-ana balasymen birge ýchaskelik pedıatrǵa barýy kerek. Ol qajetti synaqtarǵa joldama berip, kelesi mamandar: oftalmolog, stomatolog, otolarıngolog, nevropatolog, ortoped-hırýrg, logoped, kardıologqa kórsetkishter boıynsha, eger balada sozylmaly aýrýlar bolsa, tar profıldi mamandarǵa konsýltatsııaǵa jiberedi. Jalpy qan, zár analızi, nájisti taldaý, gelmıntterdiń bolýyn anyqtaıtyn enterobıoz, elektrokardıogrammany (EKG) tapsyrý qajet», - dedi Álııa Sáýkimbaeva.

Pedıatr qosymsha qalqansha beziniń ýltradybystyq jáne júrektiń ýltradybystyq tekserisine jiberýi múmkin.

«Bala barlyq mamannan ótip, analızderin tapsyrǵan soń, ýchaskelik pedıatrǵa taǵy da barýy qajet. Ol fızıkalyq kórsetkishterdi baǵalaıdy, birinshi synyp oqýshysynyń boıyn, salmaǵyn, qan qysymyn ólsheıdi, sodan keıin bir jyl boıy jaramdy dene shynyqtyrý sabaǵyna medıtsınalyq top týraly anyqtama beredi. Tirkelgen jeri boıynsha densaýlyq jaǵdaıy týraly anyqtama - tegin jáne jyl boıy jaramdy bolady», - dedi spıker.

Eger ata-ana balany tekserýden ózderi ótkizse, ol qyzmetter aqyly bolady. Ár mamannyń qabyldaýy jáne ár taldaý biraz somaǵa shyǵady.

Aqyly tekserýden ótse de, maman ata-anaǵa vaktsınatsııa kartasyn ózimen birge alyp kelý kerek ekenin aıtady.

Eger balada sozylmaly aýrý bolsa nemese ol tar profıldi mamanda esepte tursa, onyń qolynda beıindi dárigerdiń qorytyndysy bolýy kerek.

«Mektepke deıingi medıtsınalyq tekserý bos sóz emes. Onyń nátıjesi muǵalimge ár balanyń boıyna, kórý qabiletine jáne estý qabiletine sáıkes synyptaǵy jumys ornyn durys tańdaý úshin qajet. Sondaı-aq, dene shynyqtyrý muǵalimine júktemeni durys bólý jáne balanyń densaýlyǵyna zııan keltirmeý úshin atalǵan derekter qajet», - dedi dáriger.