Balasyna ekpe saldyrýdan bas tartqan astanalyq ata-analardyń 44 paıyzy oıyn ózgertken

ASTANA. KAZINFORM – Balasyna ekpe saldyrýdan bas tartqan astanalyq analardyń 44 paıyzy keıingi eki aıda vaktsınanyń mańyzdy ekenin túsingen. Elordanyń bas sanıtar dárigeri Sarhat Beısenova  osyndaı derek keltirdi.

«Astana qalasynda vaktsınatsııadan bas tartý jáne medıtsınalyq qarsy kórsetilimi bar adamdardyń sany boıynsha muqııat taldaý júrgizildi. 2023 jyldyń sońynda olardyń sany tıisinshe 5764 jáne 3468 boldy. Ata-analarmen júrgizilgen aqparattyq-túsindirý jumystarynyń nátıjesinde 2559 ata-ana tarapynan vaktsınatsııalaýdyń mańyzdylyǵyn túsinip, balalaryna ekpe saldyrdy. Osylaısha bas tartqan ata-analar sanynyń 44,4 paıyzy tarapynan túsinistikke qol jetkizildi. 2024 jylǵy 28 naýryzdaǵy jaǵdaı boıynsha medıtsınalyq qarsy kórsetilim bar balalardyń 64%-y vaktsınatsııamen qamtylǵan», - dedi ol brıfıngide.

Mamannyń aıtýynsha, jyl basynan beri vaktsınamen basqarylatyn úsh ınfektsııa boıynsha syrqattaný deńgeıi ósýkeni baıqalyp otyr. Atap aıtsaq, qyzylsha 764 jaǵdaıǵa, kókjótel 80 jaǵdaıǵa, vırýstyq A gepatıti 2 ese artqan.

«2 aıda qyzylshanyń 764 rastalǵan jaǵdaıy tirkeldi. Onyń ishinde 14 jasqa deıingi balalar arasynda 519 jaǵdaı, ekpe almaǵandar arasynda 501 jaǵdaı, egý mártebesi belgisizder arasynda jaǵdaı boldy. Búgingi tańda qyzylsha, kókjótel jáne vırýstyq A gepatıti boıynsha syrqattaný deńgeıiniń ósýine josparly ımmýndaýmen tómen deńgeıde qamtylý, ata-analardyń balasyna vaktsına saldyrýdan bas tartýy, vaktsınanyń tıimdiligi týraly qate pikirdegi adamdardyń kóbeıýi sııaqty faktorlar birden-bir sebep bolyp otyr. Osynyń barlyǵy búgingi epıdemıologııalyq jaǵdaıǵa ákeldi», - dedi Sarhat Beısenova.