Balasyn qaraýsyz qaldyrǵan 10 astanalyq ata-ananyń ústinen qylmystyq is qozǵaldy

ASTANA. KAZINFORM — Balanyń qaýipsizdigin qamtamasyz etýdi oryndamaǵany úshin ata-anaǵa nemese zańdy ókilge ákimshilik jáne qylmystyq jaýapkershilik kózdelgen. 

Onyń mán-jaıyn Astana qalasy polıtsııa departamenti Saryarqa aýdany polıtsııa bólimi bastyǵynyń orynbasary, polıtsııa podpolkovnıgi Qaırat Tilepov túsindirip berdi.

— Bıyl elorda aýmaǵynda balalardyń terezeden qulaýdyń 59 fakti tirkeldi. Ókinishke qaraı, 16 fakti ólim jaǵdaıymen aıaqtaldy. Balalardyń qaýipsizdigin qamtamasyz etýdi oryndamaǵany úshin Ákimshilik-quqyqbuzýshylyq kodekstiń 127 babyna sáıkes ákimshilik jaýapkershilik qarastyrylǵanyn eske salamyz, ol boıynsha is sotqa joldanady, — dedi Qaırat Tilepov Astana qalasy kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, bala qaýipsizdigin qamtý sharalaryn arttyrý maqsatynda polıtseıler men tótenshe jaǵdaı mamandary kópqabatty úıler men qoǵamdyq oryndarda túsindirý, aqparattandyrý jumysyn jıi ótkizedi.

— Jyl basynan beri balany qaraýsyz qaldyrý faktisi boıynsha Qylmystyq kodekstiń 140-baby 2-bóligine sáıkes 10 qylmystyq is qozǵaldy. Qazir tergeý amaldary júrip jatyr, aıaqtalǵan soń is sotqa jiberilip zańdy sheshim qabyldanady. Odan bólek balasyn túngi ýaqytta qadaǵalamaǵan 895 ata-ana ákimshilik jaýapqa tartyldy, — dep tolyqtyrdy spıker.

Buǵan deıin dáriger terezeden qulap, jaraqat alǵan balalar sany eki ese óskenin aıtyp, dabyl qaqty. 

Jyl basynan beri elordada 13 bala terezeden qulap, kóz jumdy.