Almaty oblysynda balasyn asyraýdan bas tartqan 33 adam sottalyp, 108-i qamaldy

ASTANA. KAZINFORM — Almaty oblysynyń prokýrorlary 3,5 mlrd teńge alıment óndirdi, dep habarlaıdy oblystyq prokýratýranyń baspasóz qyzmeti.

Vedomstvo málimetinshe, osy jyldyń segiz aıynda 3,5 mlrd teńge kólemindegi alımenttik bereshek óteldi.

— QR Qylmystyq kodeksiniń 139-baby (balalardy asyraýǵa arnalǵan qarajatty tóleý jónindegi mindetterdi oryndamaý) boıynsha 50 qasaqana tólemegen boryshker qylmystyq jaýaptylyqqa tartyldy. Onyń ishinde 33 adam sottalyp, taǵy 17 is bereshektiń erikti túrde ótelýine baılanysty toqtatyldy. Mysaly, aýdandyq sot boryshker «A»-ny 2,1 mln teńge qaryzy úshin bir jylǵa bostandyǵyn shekteýge úkim shyǵardy. Ol eki jyldan astam ýaqyt boıy balasyn asyraý jónindegi mindetin oryndamaǵan, — delingen habarlamada.

Sonymen qatar, alımenttik qaryzdardy óteý úshin 4 jyljymaıtyn múlik (jer telimderi, úıler) tárkilendi. Máselen, 5 mln teńge bereshegi bar boryshker «I»-diń ornyna sot oryndaýshysy Eńbekshiqazaq aýdanyndaǵy 100 sharshy metr turǵyn úıdi óndirip aldy.

— Prokýratýranyń bastamasymen 169 boryshker ákimshilik jaýaptylyqqa tartylyp, olardyń 108-i 5 táýlikke deıin qamaýǵa alyndy. Mundaı sharalar ata-analyq mindettemelerin qasaqana oryndamaı júrgender úshin aıqyn tájirıbe bolyp otyr, — dep atap ótti prokýratýra.

Prokýratýra alımenttik mindettemelerdiń áleýmettik mańyzy zor ekenin, al olardy oryndaýdan jaltarǵan árbir jaǵdaı qylmystyq-quqyqtyq jáne ákimshilik tártippen jolyn kesetinin habarlaıdy. 

Osydan buryn qyzylordalyq ákeniń alımenti 8 mln teńgeden asyp ketkenin jazǵan edik.