Balasy aýlada boqtasa, ata-anaǵa aıyppul salynady – ІІM

ASTANA. KAZINFORM – Balalar kóshede boqtap, beıádep sóz aıtsa, ata-anasy aıyppul tóleıdi. Іshki ister mınıstrligi zańnama jaǵyn túsindirdi.

Beıádep sóz aıtý – Qazaqstan Respýblıkasynyń Ákimshilik quqyq buzýshylyq týraly kodeksiniń 434-baby boıynsha usaq buzaqylyq. 

Eger bala boqtap nemese buzaqylyq jasasa – jaýapkershilik ata-anaǵa júkteledi. Aıyppul mólsheri balanyń jasyna baılanysty:

- 14–16 jas – ata-anasyna 7 aılyq eseptik kórsetkish (AEK), ıaǵnı 27 524 teńge aıyppul salynady (QR ÁQBtK 435-bap). 

- 16–18 jas – jasóspirimniń ózine aıyppul salynýy múmkin, biraq tabysy bolmasa, ata-anasy tóleıdi. 10 AEK-ke deıin, ıaǵnı 39 320 teńge (QR ÁQBtK 66-bap). 

- 12 jasqa deıin – tolyq jaýapkershilik ata-anada. 10–15 AEK mólsherinde aıyppul salynady (39 320 – 58 980 teńge) (QR ÁQBtK 127-bap). 

Kináni dáleldeý úshin polıtsııaǵa kelesi materıaldardy usyný kerek:

- kýágerlerdiń aryz-shaǵymy;

- beıne nemese aýdıojazba;

- ınternette nemese jazbasha túrdegi qorlaý jaǵdaıyna qatysty saraptama qorytyndysy.

Eske salaıyq, elimizde prank úshin 7 jylǵa deıin jaza arqalaýy múmkin. Osy oraıda blogerler men halyq neni bilýi kerektigine sholý jasaǵan edik.