Balasy 1,5 jasqa tolmaı jumysqa shyqqan analardyń járdemaqysy saqtalady
ASTANA. KAZINFORM – Endi balasy 1,5 jasqa tolmaı jumysqa oralǵan analarǵa bala kútimine baılanysty áleýmettik tólem toqtamaıdy. Bul ózgeris áıelderdiń jumysqa oralýyna kedergi keltiretin shekteýdi joıýǵa baǵyttalǵan. Sonymen qatar bala týýyna baılanysty járdemaqylardy taǵaıyndaý kezinde otbasynyń ál-aýqat sanaty eskeriledi.
Bul týraly Eńbek jáne halyqty áleýmettik qorǵaý mınıstri Asqarbek Ertaev málimdedi.
Áleýmettik saqtandyrý júıesine eki jyl jáne odan da kóp ýaqyt qatysqan áıelderge Memlekettik áleýmettik saqtandyrý qorynan bala kútimine baılanysty tólenetin tólem otbasynyń sanatyna qaramastan saqtalady.
Muqtajdyq qaǵıdaty tek bıýdjetten tólenetin bala týýyna baılanysty birjolǵy járdemaqyǵa ǵana qoldanylady. Járdemaqyny S, D jáne E sanatyndaǵy otbasylar alady.
– Jumys istemeıtin áıelderge beriletin eki tólem de respýblıkalyq bıýdjetten qarjylandyrylady. Bul – bala týýyna baılanysty birjolǵy járdemaqy jáne bala 1,5 jasqa tolǵansha beriletin aı saıynǵy járdemaqy. Eki tólem de muqtajdyq deńgeıine oraı taǵaıyndalady. A jáne V sanattaryndaǵy otbasylarǵa atalǵan járdemaqylar taǵaıyndalmaıdy. S, D jáne E sanattaryndaǵy otbasylardyń tólemderdi alý quqyǵy saqtalady, – dedi Asqarbek Ertaev Ortalyq kommýnıkatsııalar qyzmetinde ótken baspasóz máslıhatynda.
Sonymen birge, áıelderdiń jumyspen qamtylýyna kedergi keltiretin taǵy bir shekteý alynyp tastaldy.
Eger áıel balasy 1,5 jasqa tolǵansha jumysqa shyqsa, bala kútimine baılanysty áleýmettik tólem toqtatylmaıdy. Ol belgilengen merzim aıaqtalǵanǵa deıin tólene beredi.
– Áıel jumysqa oralý men áleýmettik tólemdi saqtap qalýdyń birin tańdamaǵany jón. Júktilikke jáne bosanýǵa baılanysty tólem otbasynyń sanatyna qaramastan burynǵy tártippen saqtalady, – dedi A. Ertaev.
Buǵan deıin Eńbek mınıstri «A» sanatynyń belgilerin ataǵan edi.
Járdemaqy úshin ajyrasýdyń aldyn alý úshin bólek turatyn ata-analar da balanyń otbasy quramyna engiziledi.
Eńbek mınıstri 36 járdemaqynyń 14 túrine ǵana muqtajdyq krıterııi engiziletinin aıtýda.
