«Balapandy kúzde sanaıdy nemese qyrkúıekke deıin keminde 50 ákim aýystyrylady» - BAQ-qa sholý
***
Keshe Memleket basshysy Nursultan Nazarbaevtyń qatysýymen VІ Astana ekonomıkalyq forýmynyń aıasynda Búkilálemdik daǵdarysqa qarsy konferentsııa ótti. Osy jaıt arqaý bolǵan maqala «Egemen Qazaqstan» gazetiniń búgingi sanynda «Jahandyq daǵdarystan shyǵý jolyn izdegen jıyn» degen taqyryppen berilgen. Basylymnyń atap ótýinshe, BUU-nyń qoldaýymen tuńǵysh ret ótkizilip otyrǵan Búkilálemdik daǵdarysqa qarsy konferentsııany (BDQK) ótkizý bastamasyn alǵash ret kún tártibine qoıǵan da Elbasy Nursultan Nazarbaev bolatyn. Sóıtip, Táýelsizdik saraıynda álemniń 132 memleketinen kelgen 11 myńǵa jýyq saıasatkerler, sarapshylar jáne is basyndaǵy mamandar álemdik ekonomıkanyń jahandyq daǵdarystan shyǵý joldarynyń túıindi problemalaryn tilge tıek etti. «G-Global»-dyń basty maqsaty álemdik damýdyń jahandyq paradıgmalaryn beı-bereket ózgertý úrdisterine tıimdi oń balamalar usyný bolatyn. Ol bes qarapaıym da túsinikti qaǵıdattyń biriktirýshi áleýetterine negizdelgen. Eske sala ketsek, olar: birinshiden, evolıýtsııa jáne saıasattaǵy revolıýtsııalyq ózgeristerden bas tartý; ekinshiden, ádilettilik, teńdik, konsensýs; úshinshiden, jahandyq toleranttylyq jáne senim; tórtinshiden, jahandyq transparenttilik; besinshiden, júıeli kóptektilik», - dedi jıyn barysnyda N.Nazarbaev.
«Ústimizdegi jylǵy 26 qyrkúıekke deıin Ulttyq komıssııa «A» korpýsyna iriktep alǵan rezervtegiler keminde Qazaqstandaǵy 50 qala men aýdan ákimderin aýystyratyn bolady. Bul týraly Memlekettik qyzmet isteri agenttiginiń tóraǵasy Álıhan Baımenov málimdedi», - dep jazady «Egemen Qazaqstan» gazeti búgingi sanyndaǵy «Balapandy kúzde sanaıdy nemese qyrkúıekke deıin keminde 50 ákim aýystyrylady» degen taqyryptaǵy maqalasynda.
«Men «A» korpýsyndaǵy 550 orynǵa 2000 adamnyń tapsyrys bergenin atap ótkim keledi. Bulardyń 200-i biliktilik talaptaryna sáıkes kelmeıtin kadrlar retinde alynyp qaldy. Alǵashqy 7 kúnniń ishinde 1800 adamnyń 1100-ge jýyǵy testileýden ótti. Bulardyń shamamen 67 paıyzdaıy synaqty sátti tapsyrsa, 37 paıyzdaıy qulap qaldy. Budan shyǵatyn qorytyndy sol, 50-den astam qala men aýdannyń ákimi óz bilikteri men bilimderiniń tómen ekenin kórsetti. Demek, 26 qyrkúıekke deıin olardyń oryndaryn Ulttyq komıssııa iriktep alǵan rezervtegiler qataryndaǵy basqa kadrlar basady», - deıdi Á.Baımenov.
***
Іshki ister mınıstrliginde áıelderdiń konstıtýtsııalyq quqyqtaryn, bostandyqtary men zańdy múddelerin qorǵaýdy qamtamasyz etý, áıelderge qatysty zorlyq-zombylyqtyń aldyn alý jáne jolyn kesý, sondaı-aq áıelderge qatysty zorlyq-zombylyqtyń túrlerine, nysandary jáne ádisterine, olardy jasaýǵa yqpal etetin sebepter men jaǵdaılarǵa analıtıkalyq zertteýler jasaıtyn arnaıy qyzmet qurylǵan. Bul mindetterdi iske asyrý úshin Іshki ister mınıstrligi Qazaqstan Respýblıkasy Prezıdentiniń janyndaǵy Áıelder isteri jáne otbasy-demografııalyq saıasat jónindegi ulttyq komıssııalarmen, basqa da múddeli memlekettik organdarmen jáne úkimettik emes uıymdarmen ózara tyǵyz qarym-qatynas jasaıdy. Osy rette «Aıqyn» gazeti Іshki ister mınıstrligi Ákimshilik polıtsııa komıteti tóraǵasynyń orynbasary, polıtsııa polkovnıgi Serik Súıinbaevpen osy bólimniń qyzmeti jaıly suhbattasqan. Suhbat «Jábirlengen áıel tıisti oryndarǵa ashyq túrde júgine almaıdy» degen taqyryppen berilgen.
«Aıqyn» gazetiniń jazýynsha, búginde ǵalamtorǵa táýeldilik atty jańa derttiń paıda bolǵany jasyryn emes. The Independent basylymynyń málimdeýinshe, adamnyń ǵalamtorǵa táýeldiligi ishimdik, kokaın nemese marıhýanaǵa táýeldilikpen birdeı eken. Negizinen, kompıýter tutynýshylarynyń 5-10 paıyzy ǵalamtorǵa táýeldi. Eresekterdi bylaı qoıǵanda, bul kúnde jasóspirimder men búldirshinder de ǵalamtor atty sheksiz álemge baılanyp otyr. Ókinishke qaraı, elimizde ǵalamtordan zııan shekken balalar týraly derek joq. Óıtkeni el aýmaǵynda arnaıy zertteý jumystary júrgizilmeıdi eken. Áıtkenmen mektep jasyndaǵy balalar árqıly áleýmettik jelilerdiń turaqty «qonaǵyna» aınalǵaly qashan. Tipti sabaq ústinde uıaly telefon arqyly hat alysatyn oqýshylar da jetkilikti. Maqala «Balaǵa jabysqan dert» degen taqyryppen berilgen.
***
«Kazahstanskaıa pravda» gazetiniń jazýynsha, Qazaqstan Prezıdenti Nursultan Nazarbaev VI Astana ekonomıkalyq forýmy aıasynda Birikken Ulttar Uıymynyń ókilderimen kezdesý ótkizdi. Kezdesýge BUU Bas Assambleıasy 67-shi sessııasynyń tóraǵasy V.Eremıch, BUU Ekonomıka jáne áleýmettik keńesiniń tóraǵasy Nestor Osorıo, Fıdjı araldary respýblıkasynyń Syrtqy ister jáne halyqaralyq yntymaqtastyq mınıstri, Qytaı jáne 77 tobynyń tóraǵasy R.Kýbýabola, BUU Bas hatshysynyń Ekonomıka jáne áleýmettik máseleler jónindegi orynbasary Ý.Hýnbo, BUU ıÝNKTAD saýda jáne damý jónindegi konferentsııasynyń bas hatshysy S.Panıtchpakdı, BUU Bas hatshysynyń orynbasary - Eýropa ekonomıka komıssııasynyń atqarýshy hatshysy S.Alkalaı jáne BUU Azııa jáne Tynyq muhıtyna arnalǵan ekonomıka jáne áleýmettik komıssııasynyń bas ekonomısi jáne dırektory N.Kýmar qatysty.
