«Balapan» telearnasynyń 5 jyldyǵyna oraı oıyn-saýyq sharalary uıymdastyrylady
ASTANA. QazAqparat - 27 qyrkúıek kúni birinshi otandyq balalar arnasy óziniń 5 jyldyǵyn atap ótedi. Telearnany qurý ıdeıasy Prezıdent Nursultan Nazarbaevtyń bastamasy bolatyn.
Habar taratý qazaq tilinde júrgiziledi. Telearna «Qazaqstan» Respýblıkalyq teleradıokorporatsııasynyń (RTRK) quramyna kiredi, dep habarlaıdy «Qazaqstan» RTRK baspasóz qyzmetinen.
Arnanyń týǵan kúnine oraı kórermender arasynda baıqaý jarııalandy. Onyń sharttary boıynsha qazaqstandyq ata-analar 25 tamyzǵa deıin óz oılarynan qurastyrǵan ertegilerin telearnaǵa joldaýlaryna bolady. Eń úzdik ertegi jelisi boıynsha televızııalyq qoıylym túsirilip, kitap shyǵarylady.
Arnanyń týǵan kúnine oraı kishkentaı kórermenderge arnalyp 22 qyrkúıekte «Qazmedıa ortalyǵynyń» úlken zalynda Dısneı usynǵan «Aqshaqar» mýltfılminiń tusaýkeseri ótkiziledi.
Al 24 qyrkúıekte «Kazmedı ortalyǵynyń» hollynda baldyrǵandarǵa arnalyp merekelik sharalar men kórmeler uıymdastyrylyp ótkiziledi. Qonaqtardy san túrli qyzyqty oıyn-saýyq baǵdarlamalar kútýde.
«Balapan» balalar tanymdyq oıyn-saýyq telearnasynyń maqsaty - ósip kele jatqan jas býynnyń ulttyq jáne mádenı tulǵasyn qalyptastyrý, otanǵa degen súıispenshilik pen úlkenderdi syılaýǵa, «ıntellekt» ıesi, bilim men ǵylymnyń shyńyna shyǵar azamat bolyp er jetýine yqpal jasaý jáne deni saý, rýhanı oılaý dárejesi bıik, mádenıetti, parasatty, ar-ojdany mol, eńbeksúıgish, isker, boıynda basqa da ıgi qasıetter qalyptasqan urpaq tárbıeleý bolyp tabylady.
«Balapan» telearnasy alǵashynda 12 saǵat habar taratsa, búginde 14 saǵat boıy efırge shyǵady. Onyń baǵdarlamalary úsh jastan on jasqa deıingi jasóspirimderge arnalǵanymen, eresek aýdıtorııanyń da yqylasyna bólenip úlgerdi.
Sheteldik kontenttiń sanyn azaıtýdyń arqasynda menshikti quramdy ulǵaıtý múmkin bolyp otyr. Búgingi tańda menshikti óndiris sany 30 paıyzdan 80-ge deıin kóbeıip otyr.
Esterińizge sala keteıik, «Balapan» balalar telearnasy 6 shildeden bastap 70 myń halqy bar Baıqońyr qalasynda da habar tarata bastady.
«Balapan» kórermenderge «Otaý TV» ulttyq jerseriktik televızııa jelisi, 78 kabeldik operatorlar men 2 efırlik habar taratýshylar arqyly jetkiziledi.
