«Balapan» telearnasynda - «Altyn qulyn» halyqaralyq jyr dodasy!
ASTANA. QazAqparat -«Balapan» telearnasy jas jyrshylardyń arasynda elimizde alǵash ret «Altyn qulyn» atty halyqaralyq jyr dodasyn uıymdastyrady.
Bul týraly telearnanyń baspasóz qyzmeti habarlady.
Baıqaýǵa 7 men 15 jas aralyǵyndaǵy halqymyzdyń asyl murasy - aýyz ádebıetimiz ben mádenıetimizdi jalǵastyrýshy daryndy, ónerli balalar qatysa alady. Baıqaýdyń óńirlik irikteý týrlary mamyr aıynyń 13-i men 19-y aralyǵynda ótedi. Oǵan Qazaqstan, Qytaı, Mońǵolııa, Ózbekstan, Reseı, Qyrǵyzstan elderiniń jas daryndary qatysady.
Jyr dodasyna qoıylatyn negizgi talaptar: batyrlar jyryn mánerlep oqý sheberligi; baıqaýǵa berilgen (jas ereksheligine qaraı) «Alpamys batyr», «Qyz Jibek» jyrlaryn mindetti túrde tolyǵymen jatqa bilý jáne basqa da jyrlardan úzindiler oqý; qazaqtyń ulttyq aspaptarynyń birinde oınaı bilý; halqymyzdyń salt-dástúrlerin bilý; qazaqı naqyshtaǵy kıim úlgisi; jyr aıtýdan basqa da óz ónerin kórsetý, ıaǵnı ulttyq aspaptyń súıemeldeýimen halyq ánderin, termeler oryndaý nemese kúı tartý.
Qatysatyn talapkerlerdiń jas erekshelikteri: kishi top, 7-11 jas aralyǵy; úlken top, 12-14 jas aralyǵy.
Aımaqtyq aınalym óńirlerde 2014 jyldyń 13-19 mamyr aralyǵynda (Atyraý, Shymkent, Óskemen, Kókshetaý oblystary jáne Almaty men Astana qalalarynda); jartylaı jáne aqtyq fınaldar maýsym aıynda Astana qalasynda ótedi.
Qatysýshylardy baǵalaýda balanyń jattaý jáne este saqtaý qabileti, oqý máneri, akterlik sheberligi eskeriledi. Baıqaý erejeleri men jyr nusqalaryn «Balapan» telearnasy saıtynan (balapantv.kz) alasyzdar.
Tuńǵysh daryndy jyrshylardyń óner báıgesinde óz baǵyńdy syna, jas óren!
