«Balapan» telearnasynda 10 serııaly ál-Farabı týraly anımatsııalyq telehıkaıa kórsetiledi

NUR-SULTAN. QazAqparat - Táýelsizdiktiń 30 jyldyǵyna oraı balalarǵa arnalǵan «Ál-Farabı» anımatsııalyq telehıkaıasy jaryqqa shyqty, dep habarlaıdy QazAqparat QR Aqparat jáne qoǵamdyq damý mınıstrligine silteme jasap.

«Balapan» telearnasy Qazaqstan Táýelsizdiginiń 30 jyldyǵyna oraı balalarǵa arnalǵan «Ál-Farabı» telehıkaıasyn jaryqqa shyǵardy.

2D tehnıkasynda jasalǵan telehıkaıanyń jobasyna árqaısysy 8 mınýttan turatyn 10 serııa kirdi.
Onda balalar ataqty jerlesi, ǵylymnyń damýyna eleýli úles qosqan, álemge tanymal ǵalym jáne fılosof Ábý Nasyr ál-Farabıdiń ómiri men onyń ǵylymı jetistikterimen tanysýǵa múmkindik alady. Jobada ǵulamanyń balalyq shaǵy, ǵylymǵa kelý joly keńinen sýretteledi.
«Balalardyń el tarıhyn bilýge, sondaı-aq Ál-Farabıdiń ǵalym men aǵartýshy retindegi obrazy arqyly búldirshinderdiń ǵylymǵa degen umtylysyn oıatatyndaı bilim beretin telehıkaıany jasaýdy maqsat kórdik», - deıdi «Balapan» telearnasynyń dırektory Maqpal Jumabaı.
Jobanyń basty maqsaty - mektepke deıingi jáne mektep jasyndaǵy balalar arasynda ǵylymı bilimnyń mańyzdylyǵyn nasıhattaý.
Anımatsııalyq telehıkaıa Nur-Sultan ýaqytymen 20:30, 23:00-de dúısenbiden jumaǵa deıin «Balapan» telearnasynda kórsetiledi.