«Balapan» telearnasy habar taratý merzimin uzartty
ASTANA. 2 aqpan. QazAqparat /Aıdar Ospanalıev/ - «Qazaqstan» respýblıkalyq teleradıokorporatsııasy» aktsıonerlik qoǵamy «Balapan» telearnasynyń habar taratý merzimin uzartty.
Bul týraly búgin Mádenıet jáne aqparat mınıstrliginiń alqa májilisinde atalmysh aktsıonerlik qoǵamnyń prezıdenti Nurjan Muhamedjanova málim etti.
Onyń aıtýynsha, «Qazaqstan Respýblıkasynyń tele, radıohabarlar taratý týraly» zańy medıaındýstrııanyń jańa, tarıhı kezeńin qalyptastyrdy deýge bolady. «Bul zańnyń qabyldanýyn biz uzaq kútken edik. Abyroı bolǵanda, ótken jyly bul qujat kúshine enip, elimizdiń aqparat taratý salasyna tyń serpin berdi. Bul zań ulan-baıtaq jeri bar memleketimizde sandyq televızııa taratý isine úlken jol ashyp otyr. Sonymen qatar ol eldegi habar taratatyn buqaralyq aqparat quraldary arasynda básekelestiktiń oryn alýyna yqpal etýde», - dedi aktsıonerlik qoǵam prezıdenti.
Onyń sózinshe, elimizde jaqynda ǵana qurylǵan «Mádenıet» telearnasy osyǵan deıin 16 saǵat, «Balapan» telearnasy 13 saǵat habar taratyp kelgen. «Al bıylǵy jyldyń qańtarynan bastap, «Balapan» telearnasy 17 saǵat habar taratýda. «Bul bizdiń kishkentaı búldirshinderimizge degen qamqorlyǵymyzdyń kórinisi. Sondyqtan bul máseleni erekshe atap ótkim keledi», - dedi N.Muhamedjanova.
