«Balapan» telearanasy 3 jasqa toldy
ASTANA. 27 qyrkúıek. QazAqparat - «Qazaq televızııasyndaǵy tuńǵysh balalar arnasy - «Balapan» búgin 3 jasqa toldy», - dep habarlady «Qazaqstan» AQ» respýblıkalyq teleradıo kesheniniń baspasóz hatshysy Tanakóz Tolqynqyzy.
Telearna 2010 jyldyń 27- qyrkúıeginde «Qazaqstan» RTRK AQ-nyń quramynda ashylǵan. 3-12 jas aralyǵyndaǵy balalarǵa arnalǵan telearna tek qazaq tilinde habar taratady. «Balapan» telearnasy alǵashynda 12 saǵat habar taratty. Búginde 17 saǵat boıy kabeldik jelide efırge shyǵady.
Telearna kishkentaı kórermenderine tanymdyq, sporttyq, ıntellektýaldyq oıyndar men mýzykalyq shoý, otbasylyq habarlar, anımatsııalyq mýltfılmder men balalarǵa arnalǵan telehıkaıalar usynýda. Búginde «Balapan» balalardyń aınymas serigine aınaldy. Búldirshinderdiń oı-órisin damytyp, zerde-zeıinin ushtaıtyn, tálim-tárbıe beretin, ulttyq tarıh pen salt-dástúrdi sanasyna sińiretin san túrli baǵdarlamalar jasaldy.
Elimizdegi balalarǵa arnalǵan birden-bir telearna bıyl jańa maýsymdy tyń jańalyqtarymen bastady. Atap aıtsaq, tuńǵysh balalarǵa arnalǵan «Tompaq» fantastıkalyq telehıkaıasy, sán álemimen tanystyratyn «Ádemi-aı», balalardy ǵylymǵa baýlıtyn «Bilgishter beketi» baǵdarlamasy, kompıýterdiń qyry men syryn úıretetin «Chıp pen Baıt» jáne birneshe sheteldik mýlthıkaıalar usynýda. Sonymen qatar, basqa da baǵdarlamalardyń jańa maýsymy túsirildi. Telearnanyń balapantv.kz caıty balalarǵa arnalǵan túrli oıyndar, mýlthıkaıalar, jańalyqtar, tanymdyq materıaldar men qyzyqty aqparattar usynady.
