«balapan» kórermenderin jańa maýsymda ne kútedi
ASTANA. QazAqparat - Búgin búldirshinder telearnasy «balapan»-ǵa 8 jyl toldy. Týǵan kúnge oraı uıymdastyrylǵan merekelik keshte telearnanyń bas prodıýseri Sandýǵash Baımahanqyzy jańa maýsymda kishkentaı kórermenderdi qandaı jańalyqtar kútip turǵanyn QazAqparat tilshisine áńgimelep berdi.
«Ústimizdegi jyly «balapan» telearnasy 50-den astam jobany júzege asyrdy. Telekórilim zertteýlerin, balalardyń kúntizbesin, kórermender pikirin eskere otyryp, maýsym aıynan bastap telearnanyń kórsetilim setkasyna aıtarlyqtaı ózgerister engizdik, ıaǵnı 4 blokty baǵdarlamalaýdy 2 blokty júıege aýystyrdyq. Bul óz kezeginde efırdegi teleónimderdiń qaıtalanýyn qysqartty. Nátıjesinde, arnamyzdyń reıtınginde turaqty ósim baıqaldy», - deıdi «balapan» telearnasynyń bas prodıýseri Sandýǵash Baımahanqyzy.
Kúzgi maýsymdaǵy jańalyqtardyń biri - qazaq kúılerine negizdelgen 20 fılmnen turatyn «Qońyr qaz» týyndysy kórermender nazaryna usynyldy. Jáne Elbasynyń «Bolashaqqa baǵdar: Rýhanı jańǵyrý» baǵdarlamasynyń jalǵasy retinde elimizdiń 80-nen astam tarıhı eskertkishin qamtyp, 20-dan astam nysannyń 3D modelin jasaǵan «Jumbaq jer» teleekspedıtsııasy júzege asty.
«Bizdiń kórermender «shetelde sýpermen, temir adam sekildi balalar elikteıtin qaharmandar bar, al bizde ne bar?» dep jıi suraıdy. Osyǵan baılanysty elimizdiń belgili anımatorlary, etnograf jáne balalar jazýshylarymen aqyldasyp, birige jumys jasaý nátıjesinde ózimizdiń ulttyq qaharmandardan anımatsııalyq mýltserıaldar jasap shyǵardyq jáne ol sanaýly kúnderden soń búldirshinderdi qýantady. Osylaısha «balapan» telearnasy tuńǵysh ret anımatsııalyq ulttyq qaharman jasaý ıdeıasyn júıeli túrde júzege asyrýda», - deıdi bas prodıýser.
Odan bólek, «Altyn qazyq» etnotanymdyq realıtı shoýy, ulttyq bı ónerine qurylǵan «Qos alqa» jáne ulttyq ónerimizdi ulyqtaıtyn «Úıren de jıren» jobalary túsirilip jatyr.
«Sonymen qatar, balalar telearnasy sheteldiń ozyq kınokompanııalarynyń anımatsııalyq ónimderin kásibı dýblıaj jasap, qazaq tilinde usynady. Atap aıtsaq, bıyl ataqty «Dısneı» kompanııasynyń 30-dan astam tolyqmetrajdy fılmin ana tilimizde dýblıajdap kórsete bastadyq. Álemdik reıtıngterde alǵashqy oryndarda turǵan mýlthıkaıalar da - bizdiń efırimizde», - deıdi S.Baımahanqyzy.
Buǵan deıin habarlaǵanymyzdaı, búgin Astanada «balapan» telearnasynyń 8 jyldyq týǵan kúnine oraı balalarǵa arnalǵan merekelik kontsert ótti.
