«Balapan» balalar telearnasy kishkentaı kórermenderin jańa maýsymdaǵy úzdik jobalarymen qýantpaq
ASTANA. 10 qyrkúıek. QazAqparat - «Balapan» telearnasy kishkentaı kórermenderin bıyl da aýqymdy, mazmundy, mándi týyndylarymen qýantqaly otyr» dep habarlady «Qazaqstan» AQ» respýblıkalyq teleradıo kesheniniń baspasóz hatshysy Tanakóz Tolqynqyzy.
Jańa maýsymda alýan túrli janrdaǵy 30-ǵa jýyq joba túsirildi. Sonyń ishindegi birneshe jobaǵa toqtalsaq.
«Balapan jáne onyń dostary» oıyn-saýyqtyq mýlthıkaıasy. Joba áli oqyp, jaza almaıtyn 2-den 5 jasqa deıingi balalarǵa arnalǵan. Zertteýlerge súıensek, balanyń sanasy 0-den 6 jasqa deıingi aralyqta qarqyndy damıdy. Osy kezeńde mıdaǵy neırondar kóbeıip, balanyń oılaý júıesi qalyptasyp, adamı-rýhanı qundylyqtary aıqyndalady. Dál osy aralyqta mıdyń negizgi múmkindikteri, balanyń psıhıkalyq-áleýmettik zerdesi jetilip, ári qaraıǵy damýyna (oqýyna, ıaǵnı mektepke, ınstıtýtqa, ómirge beıimdelýine) jol ashylady. Mýlthıkaıa ereksheligi, Botaqan, Qoshaqan, Buzaýhan, Qulynshaq syndy halyqtyq sana-sezimimizge jaqyn tórt túlik tólderiniń negizgi keıipkerler retinde kórinýi. Olar túrli jaǵdaıǵa tap bolyp, Balapanmen birlese otyryp qarapaıym, balalarǵa túsinikti máselelerdi sheshedi. Neniń durys, neniń burys ekenin aıqyndaıdy.
«Batyrlar» 4 serııaly qysqametrajdy fılmi. Bul anımatsııalyq fılm joǵary sapaly Motion Capture (jańa janr) janrynda túsirilmek. Joba bilektiń kúshimen, naızanyń ushymen ulan-ǵaıyr jerimizdi jaýlardan qorǵaǵan batyrlar jaıynda syr shertedi. Ár serııada bir batyrdyń ómiri, jaýgershilik zamandaǵy erligi, boıyndaǵy asyl qasıetteri ashylady. Mýltfılm atasynyń nemerelerine áskerı qolbasshylardyń ómirin baıandap berýinen bastalady. Atasy erjúrek batyrlardyń kishkentaı kezinen bastap qalaı shynyqqanyn, jaýgershilik zamanda aqyl men kúshti qatar qalaı alyp júrgenin tereńdete aıta túsedi. Balalar qaısar babalarynyń erligine tánti bolady.
«Erden atanyń áńgimeleri» tarıhı-tanymdyq anımatsııalyq serıaly. Joba ulttyq tarıhymyzdyń eleýli kezeńderin taldap, mańyzdy oqıǵalarmen ekshep beredi. Anımatsııalyq fılm qazaq jerindegi eń alǵashqy memlekettik qurylym Saqtar memleketinen bastap, Alash Orda kezeńine deıingi aralyqty qamtıdy. Adamzat damýynda ózindik orny bar kóshpendiler órkenıeti, sol órkenıettiń murageri - qazaq halqynyń tarıhyn júıeli túrde saraptaıdy. Álemdik ǵylymdardyń qaınar bastaýynda turǵan Ál Farabı kezeńi, dúnıeniń damý dóńgelegin jyldamdatyp, jańa satyǵa kótergen Uly Jibek joly fenomeni, búgingi quqyqtyq qatynastarymyzdyń bastaýy - Táýkeniń «Jeti jarǵy» zańdar júıesi, jońǵar shapqynshylyǵyna qarsy azattyq kúresteri, Alashorda tarıhy syndy taqyryptarymyz - balalarymyzdyń otanshyldyq sezimin oıatyp, óz tamyryna degen qurmetin ári bilimin arttyratyny sózsiz.
«Álı men Aııa» mýlthıkaıasy. Bul joba «Balapannyń» eń kishkentaı kórermenderine arnalǵan, Dúnıege, ózin qorshaǵan álemine endi nazar sala bastaǵan búldirshinderimiz mýlthıkaıanyń negizgi keıipkerleri Álı men Aııa arqyly aınalasyn tanı túsip, sózdik qoryn kóbeıtedi. Álı 4 jasta bolsa, Aııa 3-te. Olar apasy pen atasynyń aýylyna qonaqqa kelip, ózderin qyzyqtyrǵan barsha suraqtyń jaýabyn tabady. Mýlthıkaıa baýyrlas Túrkııa eliniń bilikti anımatsııalyq stýdııasymen birlese túsirilip, halyqaralyq sıpat alyp otyr.
«Bilgishter beketi» ǵylymı-tanymdyq baǵdarlamasy. Ǵylym - qoǵamdy alǵa bastaıtyn qýatty kúsh. Búgingi zamanaýı qoǵamǵa adamzat ǵylymnyń nátıjesinde qol jetkizdi. Jas urpaqty ǵylym men bilimge beıimdeý - búgingi Qazaqstannyń strategııalyq maqsattarynyń biri bolyp otyr. Úlken ǵylymnyń bastaýy - kishkentaı izdenisterden turatyny belgili. Osy turǵyda «Bilgishter beketi» baǵdarlamasy balalarǵa zor múmkindik berip otyr. Bilimdar oqýshylar zerthanalyq stýdııada túrli tájirıbeler jasap, ǵalym beınesine enedi.
