"Balapan" baǵdarlamasynyń aıasynda Almatyda balabaqshaǵa degen zárýlik azaıyp keledi - Ahmetjan Esimov
ALMATY. 22 qyrkúıek. QazAqparat /Erlik Erjanuly/ - Almatyda sońǵy 3 jyldyń ishinde 40-tan astam balabaqshalar mekemesi ashyldy. Olardyń basym bóligi qazaq toptary. Bul týraly qala ákimi Ahmetjan Esimov búgin Almatyda Qazaqstan halqynyń tilderi kúni merekesine oraı ótken "Ana tilim - ardaǵym" dep atalatyn festıvalde aıtty.
" Búgingi kúni Almatydaǵy 216 balabaqshanyń 81-i qazaq tilinde, 82-si aralas. Olarda tárbıelenýshilerdiń 15 myńy qazaqsha, 7 myńy oryssha tárbıe alýda. Budan basqa 15 myń sábı aralas toptarǵa baryp júr. Bir qýanarlyǵy ózge ult ókilderiniń qazaqsha tárbıe berýge degen yqylasy jyl saıyn artyp keledi. Qalamyzda 3692 ózge ult ókilderi qazaqsha tárbıelenýde. Onyń 2266-sy orys, 1426-ózge ult búldirshinderi", - deıdi A. Esimov. Ahmetjan Smaǵululynyń aıtýynsha, qazir Almatyda qazaq balabaqshalaryndaǵy sábıler sany 60 paıyzdan asty. Bul Elbasynyń Qazaqstannyń bolashaǵy qazaq tilinde degen sóziniń dáleli. Mektepke deıingi mekemelerdi oqý-ádistemelik quraldarmen jabdyqtaý da zaman talabyna laıyq jolǵa tústi. Jergilikti bıýdjet esebinen ótken jyly - 30, bıylǵy jyly - 50 serııaly anımatsııalyq fılmder ázirlenip, tegin taratyldy. Bul jumys áli de jalǵasady.
