«Balapan» arnasy jańa maýsymdaǵy jańalyqtarymen bólisti
ASTANA. QazAqparat - Elimizdegi tuńǵysh jáne jalǵyz balalar telearnasy «Balapannyń» jańa maýsymy jańalyqqa toly bolmaq. Endigi ýaqytta búldirshinderdiń ǵana emes, jasóspirimderdiń de talǵamyna saı keletin tyń jobalar jaryqqa shyǵady. Arnanyń bezendirilýi de jańa úlgige aýysqan. Elimizdiń basty balalar arnasy aldaǵy josparlary jóninde «QazAqparat» HAA saýalyna jaýap berdi.
«2017 jylǵa arnalǵan telejobalar arnaıy baıqaý nátıjesinde anyqtaldy. Onda telehıkaıa, oqý-tanymdyq anımatsııa, mýzyka, ıýmor sııaqty janrlyq baǵyttar qamtyldy. Árbir teleónim psıholog, pedagog, jazýshy, kópbalaly ana, kompozıtor, anımatsııa rejısseri syndy sarapshylardyń synynan ótken», - dep habarlady telearna.
«Balapan» arnasynda kórsetiletin kontenttiń (mýltfılm, baǵdarlama, kıno) 47% otandyq ónimdi quraıdy. Al Disney, Dreamworks, SONY, Nickelodeon, Iconix, Mondo TV sııaqty álemdik iri dıstrıbıýtorlardan alynatyn ónim úlesi - 53%.
Ótken jyly «Balapan» arnasy «Álı men Aııa», «Sálem, Astana!», «Kójekter» atty otandyq anımatsııalyq fılmderimen kishkentaı kórermenderdi qýantqan edi. Bıyl olardyń qatary «Saıahat sarbazdary», «Alan men qozyqa» syndy mýlthıkaıalarmen tolyqtyrylady. Sondaı-aq, «Qalqanqulaq» telehıkaıasynyń tusaýkeseri de osy kúzge josparlanǵan. Al Naýryz merekesine arnalǵan «Naýryzǵa asyq» atty komedııalyq eki serııaly fılmi osy aıdyń 21-22 kúnderi efırden kórsetiledi.
Sheteldik mýlthıkaıalar ishinen «Vıkıngter», «Nıls Holgerson», «Dýda men Dada», «Marın jáne onyń dostary» syndy týyndylar qazaq tiline aýdaryldy. Aldaǵy ýaqytta «Elvın jáne Borshatyshqandar (Býrýndýk)», «Ledı Bag» syndy álemge tanymal anımatsııalyq týyndylar da kórermen nazaryna usynylady.
Jańa maýsymnyń eń kúlkili oqıǵasy «Kúldir-búldir» dep atalady. Mundaǵy negizgi ıdeıa - bala tárbıesindegi ákeniń rólin aıshyqtaý. Bas keıipker aqkóńil Ǵalym Rasýl esimdi kenje ulyn patshadaı baǵamyn dep, tym erkeletip alady. Áke men kenje ul arasyndaǵy qyzyqty sıtýatsııalyq komedııa 20 naýryzdan bastap kórsetiledi.
«Balapan» telearnasy jańa maýsymda taǵy da «Dısneılendke» joldama syılaıdy. Balalardyń súıikti baǵdarlamasyna aınalǵan «Shytyrman» sporttyq-ıntellektýaldyq jobasynyń jeńimpazyna ertegiler elin aralaý múmkindigi beriledi. Ótken jyly atalmysh sporttyq saıysta jeńiske jetken 9 jasar Qanat Qatyrbata «Dısneılendke» joldama utyp alyp, ǵajaıyp qalashyqqa saıahat jasap kelgen bolatyn.
«Balapan» poshtasyna aptasyna 50-ge jýyq hat kelip túsedi. Barlyǵyna jaýap berip, tikeleı efırde keri baılanysqa shyǵady. Ózderiniń salǵan sýretterin, fotosýretterin jiberip, árdaıym jańalyqtarymen bólisip otyratyn eń belsendi kórermenderin «Balapan» jazǵy kanıkýlda Astanaǵa shaqyryp, «Astanadaǵy bir kúnim» atty teleekskýrsııa ótkizedi.
Qazaqstan Respýblıkasy Táýelsizdiginiń 25 jyldyǵyna oraı «Balapan» telearnasynyń uıymdastyrýymen tuńǵysh ret Qazaqstandaǵy balalar premııasy ótkizildi. Shalǵaıdaǵy aýyl, alys-jaqyn eldi meken, qalalardan 2000-nan astam ótinim kelip tústi, sonyń ishinde eń úzdik degen 25 balaǵa «Balapan júldesi» tabystaldy. Júldege tek talanttylar ǵana emes, adam ómirin qutqaryp, erlik jasaǵan jas batyrlar da ıe boldy. Bul jobany dástúrli túrde ótkizý josparda bar. Múmkindigi shektelýi balalar da «Balapan» arnasynyń nazarynda. Olar «Balapan juldyz» mýzykalyq baǵdarlamasyna qatysyp, úlken sahnadan óner kórsete alady.
