«Balapan» arnasy bes jasta
ASTANA. QazAqparat - «Balapan» arnasy jańadan ashylǵan kezde telearnanyń tek 10 ǵana jekemenshik jobasy bar edi. Al, qazir, bes jyl ótken soń, telearna búldirshinderge arnalǵan arnanyń baǵdarlamalaryn 50-ge jetkizdi, deıdi «Balapan» telearnasynyń merekesine arnalǵan sharada «Qazaqstan» RTRK AQ Basqarma tóraıymy Nurjan Muhamedjanova.
«Osydan bes jyl buryn ashylǵan «Balapan» telearnasy óziniń ónimin kóbeıtip keledi. Telearnanyń basty maqsaty - kórermenderi, ıaǵnı, kishkene búldirshindermen birge ósip, jetilý, barlyq teleónimderdi zamanǵa saı daıarlaý. Bunyń mańyzy zor, sebebi, Qazaqstandaǵy balalardyń tańdaýy da kóp, qazir aqparattyq keńistik ashylǵan, balalarymyz shet eldiń telearnalaryn kóretini de jasyryn emes. Sondyqtan, osy básekede balalardy ózimizdiń ulttyq naqyshtaǵy teleónimdermen qyzyqtyra bilý kerek, qyzyqtyryp otyrmyzda. Kishkentaı búldirshinderge arnap tárbıe beretin, dúnıetanymyn keńeıtetin jobalardy ázirleımiz», - deıdi saltanatty kontsertke qatysqan N.Muhamedjanova. N.Muhamedjanova tap ótkendeı, «Balapannyń» bolashaqqa kózdep otyrǵan josparlary kóp. «Telearna 2010 jyly Memleket basshysy Nursultan Nazarbaevtyń tikeleı tapsyrmasymen qurylǵan bolatyn. Bolashaqta kóp jobalardy júzege asyrý oıymyzda bar. Bul arna tanymdyq, sportty úıretetin, otbasynyń qadirin uǵyndyratyn, balalardyń kóńilin aýlaıtyn, bilim berip, jaqsy dúnıelerge daǵdylandyratyn teleónimderdi jasap, balalardyń nazaryna sapaly dúnıe usynýy kerek. Aıta keteıik, «Balapan» búldirshinderimizdiń ermegi ǵana emes, bala tárbıesine kelgende ata-ananyń senimdi kómekshisine aınalýy kerek»,-dedi N.Muhamedjanova.
