Balańyzdyń bos ýaqytyn qalaı ótkizetinin qadaǵalańyz – polıtsııa eskertý jasady
NUR-SULTAN. QazAqparat – Elordanyń polıtsııa departamenti ata-analarǵa jazǵy demalys kezeńinde kámeletke bolmaǵan balalarynyń bos ýaqytyn qalaı ótkizetin baqylaý kerektigin eskertti, dep habarlaıdy QazAqparat tilshisi.
Bul eskertý jazataıym oqıǵalardyń aldyn alý úshin jasalyp otyr. Máselen, kúni keshe ǵana elordanyń polıtsııa qyzmetkerleri joǵalyp ketken 13 jáne 14 jastaǵy 2 jasóspirimdi taýyp, ata-analaryna tabystady.
«Polıtsııaǵa 13 jastaǵy jasóspirimniń anasy júginip, qyzynyń shamamen saǵat 10-30-da úıden shyǵyp ketkenine jáne osy ýaqytqa deıin oralmaǵanyna, qaıda júrgenin bilmeıtindigine aryzdandy. Krımınaldyq polıtsııa qyzmetkerleri jasóspirimdi turǵyn úılerdiń biriniń jertólesinen tapty. Jasóspirimniń ata-anasymen janjaldasyp qalǵany anyqtaldy. Ekinshi oqıǵa kezinde 14 jastaǵy qyz anasymen renjisip qalyp, túngi saǵat shamamen 01-00-de úıden shyǵyp ketken. Tańǵa jaqyn balasynyń úıde joq ekenin bilgen anasy polıtsııaǵa aryzdandy. Polıtsııa qyzmetkerleri júrgizden jedel izdestirý is-sharasy barysynda jasóspirim Esil ózeni jaǵalaýynda tabylyp, ata-anasyna tabystaldy», - dep atap ótedi departamentten.
Taratylǵan aqparatqa qaraǵanda, osy jyldyń basynan beri kámeletke tolmaǵan jasóspirimderdiń joǵalýyna baılanysty 80 qylmystyq is tirkelgen. Balalardyń barlyǵyn polıtsııa qyzmetkerleri volenterlerdi jumyldyrý arqyly tapty.
«Volonterler joǵalǵan balalar men qart adamdardy izdeýge qatysyp, polıtsııaǵa úlken kómek kórsetedi. Týyndaǵan túrli tótenshe jaǵdaılar kezinde qol ushyn sozyp, sol arqyly ózderiniń belsendi azamattyq ustanymdaryn tanytady», - dedi Nur-Sultan qalalyq polıtsııa departamenti bastyǵynyń orynbasary Qýanysh Orynbetov.
