Balańyzdyń balabaqshasy qaýipsiz dep oılaısyz ba?
ASTANA. 2 qazan. QazAqparat - 2011 jyly 48 myńnan astam adam balabaqsha kezeginde tursa, bıyl mektepke deıingi bilim alýǵa muqtaj balalardyń sany 64 myńǵa jetken.
Bul týraly Astana qalasy prokýratýrasynyń baspasóz qyzmeti habarlady.
Qalyptasqan jaǵdaı jekemenshik nysandarda mektepke deıingi bilim berý jáne tárbıeleý mekemeleriniń keńinen taralýyna múmkindik týǵyzdy.
Osyndaı obektiler kóbine jeke úı-jaılarda (kottedjder), kóp páterli turǵyn úılerge japsarlas salynǵan úı-jaılar men páterlerde ornasqan.
Osyndaı 14 mekemeni prokýrorlyq tekserý nátıjesinde olardyń 9-ynda sanıtarlyq jáne órt qaýipsizdigi erejelerin óreskel buzý faktileri anyqtalǵan. Sondaı-aq, úı-jaıdyń sáýlet-qurylys talaptaryna sáıkes kelmeıtini de tirkelgen. Tekserý nátıjesinde 2 balalar ortalyǵy jabyldy, bireýiniń qyzmeti toqtatylý satysynda jáne biriniń qyzmeti ýaqytsha toqtatyla turady, dep habarlaıdy qalalyq prokýratýra.
Tekserý barysynda anyqtalǵan basty kemshilikter retinde sanıtarlyq-epıdemıologııalyq qorytyndynyń bolmaýy, bir balaǵa arnalǵan alań kóleminiń talaptarǵa sáıkes kelmeýi, medıtsınalyq kabınettiń joqtyǵy, qyzmetkerlerde medıtsınalyq kitapshalardyń bolmaýy, oıynshyqtardyń sapasy men qaýipsizdigin rastaıtyn sertıfıkattardyń joqtyǵy sııaqty kóptegen zańbuzýshylyqtar tirkelip otyr.
Kináliler QR ÁQK 312-baby jáne QR ÁQK 323-baby 1-bóligi boıynsha ákimshilik jaýapkershilikke tartyldy.
Bul baǵyttaǵy jumystar jalǵasýda.
Astana turǵyndary balalarǵa mektepke deıingi tárbıe jáne bilim berý obektileri jumysyndaǵy zań buzýshylyq faktileri týraly Astana qalasy prokýratýrasynyń tómendegi senim telefondaryna habarlasýyna bolady: 712433, 712119.
