Balańyz qarjylyq turǵyda saýatty bolsyn deseńiz...
NUR-SULTAN. QazAqparat – Halyqaralyq balalardyń quqyqtaryn qorǵaý kúnine oraı Fingramota.kz saıty balany qarjylyq saýattylyqqa baýlýdyń birneshe joly kórsetilgen nusqaýlyq jarııalady, dep habarlaıdy QazAqparat tilshisi.
Salalyq resýrs ata-analardyń balalardy qarjylyq saýattylyq negizderine úıretetin negizgi segiz erejeni kórsetken.
№ 1 ereje – is áreketpen úlgi bolý. Mundaǵy basty keńes – eresek adamnyń ózi qarjylyq turǵydan saýatty bolýy kerek.
«Eger ózińizde bıýdjetti josparlaýdyń qarapaıym daǵdylary bolmasa, balalaryńyzdyń uzaq merzimdi josparlaýdyń ne ekenin túsinýi qıyndaý bolady. Eger otbasyńyzda qarjy máselesi rettelgen bolsa, balańyz da eseıgende soǵan umtylady», - dep jazady Fingramota.kz.
№ 2 ereje – aqsha jaıynda tanymdyq oıyndar arqyly aqparat sińirý. Sol oıyndardyń kómegimen jalǵan aqsha men shynaıy aqshanyń aıyrmashylyǵyn, aqshanyń qaıdan kelip jatqanyn, aqshaǵa eń birinshi kezekte ne satyp alý mańyzdy ekenin túsindirý usynylǵan.
№3 ereje – balany aqsha jınaı bastaǵanyn kótermeleý.
«Balańyzdyń armandap júrgen zatyn alýy úshin aqsha jınaýǵa úıretińiz. Mundaıda sizge aqsha-qorjyn nemese qarapaıym shyny banka kómektesedi. Bastysy ydystyń ishindegi aqsha birtinep kóbeıip kele jatqany kórinip turýy kerek», - dep jazady avtor.
№4 ereje – kúndelikti shyǵyndy tıimdi josparlaý daǵdysyn úıretý. Ol úshin aptalyq «qaltapul» berý usynylǵan. Eger bala barlyq aqshasyn bir kúnniń ishinde jumsap qoısa, aqshasyz otyra turýǵa týra keledi.
№ 5 ereje – balany óz betimen saýda jasaýǵa beıimdeý. Mundaǵy basty qaǵıda - ózi jınaǵan aqshaǵa óz qalaǵan dúnıesin alǵyzý.
№ 6 ereje – óz bıýdjetn basqarýdy úıretý.
«Balaǵa siz bergen aqsha nemese týystary týǵan kúnine syıǵa bergen aqsha –tolyǵymen óziniki ekenin uqtyrý kerek. Demek, kez kelgen sheshim úshin bala ózi jaýapty bolady. Ózińizdiń mysalyńyz arqyly otbasylyq bıýdjetti qalaı júrgizetinińizdi, eńbek aqysyn qalaı úlestiretinińizdi aıta alasyz. Qansha aqshańyz mindetti tólemderge ketedi, qanshasyn eńbek demalysyna saqtap qoıasyz», - dep jazylǵan nusqaýlyqta.
№ 7 ereje – balanyń qatelesý quqyǵyn syılaý. Mamandar bul jerde balanyń aqsha máselesine kelgende kózqarasy ata-ananyń kózqarasyńyzdan erekshe bolýy múmkin ekenin eskertedi. Osyny eskerip, oyń jasaǵan áreketterin synamaý kerektigi aıtylǵan.
«Mysaly, eger ol qandaı da bir mańyzdy ári iri saýdaǵa jınaýǵa josparlaǵan aqshasyn bir sáttik qalaýyna jumsaǵan bolsa, oǵan uryspańyz. Ol úshin endi aqsha jınaý merzimi qanshalyqty uzarǵanyn birge sanańyzdar da, aqsha tabýdyń jańa múmkindikterin tabýǵa kómektesińiz», - dep jazady Fingramota.kz.
№8 ereje – qosymsha tabys nusqalaryn usyný. «Jumysty birden belgilep, somany anyqtaǵan durys. Mysaly, mindetti túrde ıtti serýendetý, úı janýarlaryn kútý, baýyrlary men qaryndastaryna qaraý, ájesine baqsha jumystarynda kómektesý jáne t.b. Eń mańyzdysy, siz «tarıfterdi» kóńil-kúıińizge qaraı aýystyrmaýyńyz kerek. Osy qarapaıym, biraq negizgi erejelerdi saqtap, siz balanyń jastaıynan aqshaǵa degen durys qatynasyn ornatasyz», - delingen habarlamada.
