Balanyń janynda temeki shegý zorlyq áreketpen teńestirilmek» - BAQ-qa sholý
***
Búgingi tańda álem elderiniń kóbin dinı ekstremızm men lańkestik áreketterdiń jıi bolatyndyǵy alańdatyp otyr. Óıtkeni, ony barsha adamzattyń tynyshtyǵyn buzýdy, halyqtar arasyndaǵy aýyzbirlikke syna qaǵýdy kózdegen jat pıǵyldy toptardyń iske asyratyny daýsyz. Bizdiń elimizde de keń aýqymda bolmaǵanmen, teris aǵymdaǵy toptardyń yqpalyna ergen jastardyń tosyn áreketterge baratyndyǵy baıqalyp júr. Máselen, sońǵy jyldary Atyraý oblysynda birneshe ret quqyq qorǵaý organdaryna qarýly qarsylyq tanytqan toptar anyqtaldy. Olardyń keı músheleriniń jarylǵysh zattar daıyndap, lańkestik áreketter jasaýǵa qatysy barlyǵy sotta dáleldendi. Bul munaıly óńirdegi dinı ahýaldyń kúrdeliligin baıqata ma? «Egemen Qazaqstan» gazeti tilshisiniń osy jáne basqa saýaldaryna Atyraý oblysynyń prokýrory Ǵalymjan Toǵyzbaev jaýap berdi. Suhbat «El tynyshtyǵyn buzýdy kózdegenderge tosqaýyl qoıylady» degen taqyryppen berilgen.
Qazaqstanda sot aktileriniń oryndalý deńgeıi adam aıtsa sengisiz óte tómen kúıde qalyp otyr. Onyń sebebi, kóptegen ortany sybaılasqan jemqorlyq, tamyr-tanystyq, nemquraıdylyq, toǵysharlyq jaılap alǵan. «Egemen Qazaqstan» gazetiniń jazýynsha, bul týraly keshe «Nur Otan» HDP janyndaǵy Jemqorlyqpen kúres jónindegi respýblıkalyq qoǵamdyq keńestiń kezekti otyrysynda ashyq aıtyldy. «Budan da soraqysy sol, Sot aktilerin oryndaý komıtetiniń qyzmetkerleriniń isti zańsyz qysqartý, atqarýshylyq is júrgizýdi toqtatyp qoıý, boryshkerlerdiń múlkine tyıym salýdy zańsyz alyp tastaý, tárkilengen múlikti zańsyz qaıtarý, alımenttik tólemder boıynsha bereshek mólsherin tómendetý, tárkilengen múlikti jymqyrý jáne zańsyz satý, atqarýshylyq sanktsııasy boıynsha shara qoldanbaý jáne t.b. úshin aqshalaı aqy bopsalaǵan derekter de anyqtalypty», - dep jazady basylym. Maqala «Sot oryndaý isinde olqylyqtar kóp» degen taqyryppen berilgen.
***
«Aıqyn» gazetiniń jazýynsha, Qazaqstannyń Premer-Mınıstri Serik Ahmetov Belorýssııa astanasy Mınskige jumys saparymen bardy. Onyń aıasynda, Serik Nyǵmetuly Belarýs Prezıdenti Aleksandr Lýkashenkonyń TMD-ǵa múshe-memleketter delegatsııalarynyń basshylarymen bolǵan kezdesýine qatysty. Kezdesý qatysýshylary «TMD elderi Úkimetteri basshylary Keńesiniń» «kún tártibine» shyǵarylatyn máselelerdi talqylady. Buǵan qosa, olar Dostastyq elderiniń ózara is-qımyldary jáne ekonomıkalyq ıntegratsııanyń ózekti máseleleri boıynsha pikir almasty. Jıyn barysynda TMD elderiniń energetıka, kólik, aýyl sharýashylyǵy, telekommýnıkatsııalar, ǵarysh, nano jáne bıotehnologııalar salalarynda birlese tabysty árekettesýi «yntymaqtastyqqa qarqyn beretin lokomotıv» bolyp tabylatyndyǵy aıtyldy. Bul rette memleketaralyq salalyq keńesterdiń tıimdi jumysy aıryqsha mańyzdy ról atqarýǵa tıis, al Dostastyqta shamamen 70 osyndaı keńes qurylyp, jumys jasaýda. Maqala «Premerler sammıti» degen taqyryppen berilgen.
«Latvııa parlamenti búldirshinderdi temeki tútinimen ýlaıtyn - ıaǵnı olardyń janynda turyp temeki shegetinderdiń ústinen qylmystyq is qozǵaıtyn zań jobasyn maquldady», - dep habarlady «Aıqyn» gazeti búgingi sanyndaǵy «Balanyń janynda temeki shegý zorlyq áreketpen teńestirilmek» degen taqyryptaǵy aqparatynda. Dárigerler qaýymy tarapynan usynylǵan jobada «Zorlyq - balanyń densaýlyǵyna zııan keltiretin qasaqana jasalǵan áreket. Demek, balanyń janynda temeki shegý de zorlyq. Óıtkeni temeki tútini bala densaýlyǵyna óte úlken zııan keltiredi» delingen. Latvııa prezıdenti qol qoıǵannan keıin jańa zań kúshine enedi. Alaıda balalarǵa ý jutqyzǵan «qylmyskerlerge» qandaı jaza qoldanylatyny ázirshe belgisiz. Degenmen dárigerler eger bala temeki tartatyn adamnyń qamqorlyǵynda bolsa, olardy qylmystyq jaýapkershilikke tartý kerek degen usynystan qaıtpaı otyr.
***
Búgingi tańda dúken sórelerinde táti shyryndardyń neshe túri tolyp tur. Degenmen, osynaý shól basar sýsyndardyń quramyndaǵy zattar kúdik týdyrýmen qatar keı jaǵdaıda qaýipti de bolatyndyǵyn bile bermeımiz. Máselen, «Ekspress K» gazetiniń tilshisine 15 túrli alkogolsyz sýsyn alý úshin 1500 myń teńge qajet bolypty. Eń qyzyǵy, «Saryaǵash» mıneraldy sýy «Master lımonad» sýsynynan nebári 10 teńgege qymbat eken. Al sońǵysynyń quramynda túrli hımııalyq jáne boıaǵysh zattar bar ekendigi belgili.
