Balanyń orta mektepti aıaqtardaǵy emtıhandy qalaı tapsyratynyn 7 jasynda bilýge bolady
ASTANA. QazAqparat - Nottıngem Ýnıversıteti men Brıstol Ýnıversıtetiniń ǵalymdary 7 jasar bala bir tapsyrmaǵa zeıin qoıyp, oıyn jınaı almasa, onda orta mektepti aıaqtardaǵy emtıhanda qınalady degen qorytyndy jasady. Mundaı tujyrym jasaý úshin mamandar 11 000-nan astam balanyń málimetin zerttegen, dep jazdy «Psych Central».
Zertteý boıynsha, balalar jeti jasqa tolǵanda, olardyń ata-analary men muǵalimderi anketa toltyrǵan. Zertteýshiler balalardyń qasıetin, sonyń ishinde alańǵasarlyǵyn, belsendiligin, albyrttyǵyn jáne ózge de problemalaryn arnaıy anketa suraqtary boıynsha baǵalaıdy.
Keıin mamandar bul aqparatty zertteýge qatysqan balalardyń 16 jasqa tolǵanynda salystyrady. Osylaısha, zertteýshiler 7 jasar balanyń alańǵasarlyq ólshemi boıynsha bir upaıy 16 jasta emtıhan tapsyrýy kezinde 2-3 upaıyn tómendetkenin ańǵardy. Emtıhanda jaqsy baǵaǵa qol jetkizý múmkindigi mundaı balalarda 6-7% kem. Sonymen qatar, ata-anasyn tyńdamaıtyn balalardyń oqý úlgerimi nashar bolǵan. Ǵalymdardyń pikirinshe, bul jańalyq ata-analar, muǵalimder men dárigerler úshin bala tárbıesindegi óte mańyzdy másele.
